Paraskad Crime 14 year old death case

मोरजी : माऊली मंदिराजवळ पोरस्कडे-पेडणे येथे सायंकाळी ४ वा. मुलाने गळफास घेऊन आत्महत्या केली असल्याची माहिती पेडणे पोलिसांना पणजीहून प्राप्त झाली. माहितीस अनुसरून माऊली मंदिराजवळ पोरस्कडे येथे घटनास्थळी भेट दिली असता, १४ वर्षांच्या अल्पवयीन मुलाने आपल्या काकाच्या राहत्या घरी आत्महत्या केल्याचे आढळले.

पोलिस येण्यापूर्वीच मृताच्या काकांनी मृतदेह खाली उतरवला. घटनेचा पंचनामा करून पोलिसांनी चौकशी केली. मृतदेह गोमेकॉच्या शवागारात ठेवण्यात आला आहे. प्राथमिक चौकशीत मुलाने आत्महत्या का केली, हे मात्र कळले नाही. मृताच्या कुटुंबीयांनी कोणताही गैरप्रकार नसल्याचे सांगितले. पेडणे पोलिस निरीक्षक सचिन लोकरे यांच्या मार्गदर्शनाखाली पीएसआय साहिल नाईक पुढील तपास करत आहेत.

माध्यमांमधील वृत्तानुसार मुलाची आई ही परदेशात नोकरीला आहे. मुलगा आईकडे पैशांची मागणी करत होता. मात्र आईने पैसे द्यायला नकार दिला होता. यातूनच त्याने टोकाचं पाऊल उचलल्याचे समजते. मात्र, पोलिसांकडून या वृत्ताला अद्याप दुजोरा मिळू शकलेला नाही.