पणजी: पणजी ते बेळगाव राष्ट्रीय महामार्गावरील चिंबल येथील जंक्शनवर उभारण्यात येत असलेल्या उड्डाणपुलाच्या दुसऱ्या मार्गाचे काम अंतिम टप्प्यात आले आहे. जानेवारी अखेरीस हे काम पूर्ण होऊन फेब्रुवारीमध्ये हा मार्ग वाहतुकीस खुला होईल, अशी माहिती येथील अभियंत्यांनी ‘गोमन्तक''ला दिली.

चिंबल जंक्शनवरील उड्डाणपुलाचा एक मार्ग गेल्या वर्षी खुला झाल्याने या महामार्गावरील वाहतुकीत सुधारणा झाली आहे. पूल उभारण्यापूर्वी या ठिकाणच्या चौकात उतारामुळे भीषण अपघात घडले होते.

अपघात घडल्यानंतर वारंवार येथील लोक उड्डाणपुलाची मागणी करत होते. अखेर आमदार रुडॉल्फ फर्नांडिस यांनी भाजपमध्‍ये प्रवेश केल्यानंतर या पुलाच्या कामाला गती आली आणि एक मार्ग वाहतुकीस खुला झाला. त्यामुळे अपघातांचे प्रमाण घटले आणि वाहतूकही सुविधा सुधारली गेली.

पुलाचा एक मार्ग खुला झाल्यानंतर दुसऱ्या मार्गाचे काम कधी होणार असा प्रश्न उपस्थित होत होता. परंतु आता या उड्डाणपुलाच्या दुसऱ्या मार्गाचे काम अंतिम टप्प्यात आले आहे. येथील खाडीवर उभारल्या जात असलेल्या उड्डाणपुलाच्या स्लॅबचे काम अंतिम टप्प्यात आले आहे.