पेडणे: पणजी – प्रवाशांच्या मालमत्तेची जबाबदारी प्रामाणिकपणे पार पाडणारा एक घटना नुकतीच समोर आली आहे. पणजी-दोडामार्ग-मोले या मार्गावर धावणाऱ्या कदंब महामंडळाच्या बसमध्ये प्रवाशाचे रोख रक्कम व महत्त्वाची कागदपत्रे असलेले पाकीट सापडले.

या बसचे वाहक बाळा अनंत केरकर यांनी हे पाकीट प्रामाणिकपणे पणजी कदंब आगारामध्ये आणून दिले.पाकिटामध्ये रोख ३०५० रुपये, आधार कार्ड, एटीएम कार्ड आणि १००० किमतीचे एडसिव्ह स्टॅम्प होते.

केरकर यांनी हे पाकीट आगाराचे नियंत्रक सुयश सावंत यांच्याकडे सुपूर्त केले. यानंतर, पाकीट हरवलेल्या प्रवाशाने आगारामध्ये येऊन ओळख पटवली. पणजी आगाराचे एटीआय देवीप्रसाद भट, गजानन गावकर आणि एटीएस सुयश सावंत यांच्या उपस्थितीत हे पाकीट त्या प्रवाशाला परत देण्यात आले.

केरकर यांच्या प्रामाणिकपणाचे सर्व स्तरातून कौतुक होत आहे. या घटनेतून प्रवासी आणि कर्मचाऱ्यांमधील विश्वास वाढवण्यास हातभार लागला असून, बाळा केरकर यांचे प्रामाणिक कार्य इतरांसाठी प्रेरणादायी ठरत आहे.