पणजी: गोव्याचे माजी मुख्यमंत्री दिगंबर कामत यांना खाण घोटाळा प्रकरणात मोठा दिलासा मिळाला आहे. पणजी प्रधान जिल्हा आणि सत्र न्यायालयाने बेकायदेशीर खाण प्रकरणात माजी मुख्यमंत्री कामत आणि खाण व्यवसायिक रवींद्र प्रकाश यांच्यासह इतर 16 जणांची आरोपातून मुक्तता केली आहे.

2018 मध्ये या प्रकरणाचा तपास करण्यासाठी स्थापन झालेल्या विशेष तपास पथकाच्या (SIT) आरोपपत्रात कामत यांचे नाव होते.

दिगंबर कामत मुख्यमंत्री पदावर असताना (2007-2012) एका खाण लीजच्या नूतनीकरणात अवैध कारभार केल्याचा आरोप त्यांच्यावर होता.

लीजधारकांनी 'मॅग्नम'सोबत करार केला आणि त्याद्वारे राज्य आणि केंद्र सरकारच्या मंजुरीशिवाय लीजचे अधिकार हस्तांतरित केले. कामत यांच्याच आशीर्वादाने खनिज उत्खनन करण्याची परवानगी देण्यात आली, असा आरोप कामत यांच्यावर करण्यात आला होता.

नियमानुसार राज्य सरकारकडे असा कोणताही अधिकार नसतो. तत्कालिन मुख्यमंत्री कामत यांनी दोन प्रशासकीय अधिकारी (IAS) यांच्या सूचनेकडे दुर्लक्ष केल्याचे माहिती समोर आली होती.