Illegal Sand Mining One Arrested Panaji

पणजी: पणजी किनारपट्टी पोलिसांनी काल रात्री वळवई-मायणा येथे धडक मोहीम राबवत मांडवी नदीपात्रात बेकायदा सुरू असलेल्या रेती उपसावर कारवाई केली. या कारवाईत एक होडीसह पाच क्युबिक मीटर रेती मिळून सुमारे १० लाखांचा मुद्देमाल जप्त केला.

याप्रकरणी संशयित समीर मोंडल (३०, पश्‍चिम बंगाल) याला अटक करण्यात आली. पोलिसांना पाहताच या बोटीवर असलेले सुमारे १२ मजूर पसार झाले. यासंदर्भात गुन्हा नोंद करण्यात आल्याची माहिती पणजी किनारपट्टी पोलिस स्थानकाचे निरीक्षक अजित उमर्ये यांनी दिली.

राज्यात रेती उपशास बंदी आहे. बेकायदा रेती उपसासंदर्भात उच्च न्यायालयात प्रकरण प्रलंबित आहे. याविरुद्ध कठोर कारवाईचे निर्देश यापूर्वीच उच्च न्यायालयाने संबंधित सरकारी यंत्रणांना दिले आहेत.

याप्रकरणी भारतीय न्याय संहितेच्या ३०३ (२),३(५) तसेच खाण आणि खनिज (विकास नियमन) कायदा आणि गोवा दमण आणि दीव गौण खनिज सवलत नियम १९८५ चा ६२ (२) अन्वये पणजी किनारी पोलिसांनी १२ संशयितांसह समीर मोंडल (३०, पश्चिम बंगाल) यांच्याविरुद्ध गुन्हा दाखल केला आहे. पसार झालेल्या मजुरांचा शोध घेण्यात येत आहे. याप्रकरणी पणजी किनारी पोलिस स्थानकाचे निरीक्षक अजित उमर्ये यांच्या नेतृत्वाखाली पोलिस पथकाने ही कामगिरी केली.