पणजी: शाश्वत मत्स्यव्यवसाय, नवोपक्रम आणि निळ्या अर्थव्यवस्थेला (ब्ल्यू इकॉनॉमी) चालना देण्याच्या उद्देशाने ‘ॲक्वा गोवा मेगा फिश फेस्टिव्हल २०२६’च्या नवव्या आवृत्तीचे आयोजन ९ ते ११ जानेवारीदरम्यान पणजीत करण्यात आले आहे.

हा महोत्सव सकाळी १० ते रात्री १० वा. या वेळेत बांदोडकर मैदानावर होणार असून, देशात प्रथमच राज्य पातळीवर असा सर्वसमावेशक मत्स्य महोत्सव आयोजित करण्यात येत असल्याचे मत्स्योद्योग मंत्री नीळकंठ हळर्णकर यांनी पत्रकार परिषदेत सांगितले.

हा महोत्सव ‘कंट्री-फर्स्ट’ संकल्पनेवर आधारित असून देशभरातील तज्ज्ञ, धोरणकर्ते, संशोधक, शिक्षणतज्ज्ञ आणि उद्योग प्रतिनिधी एकाच व्यासपीठावर एकत्र येणार आहेत. महोत्सवात शाश्वत मासेमारी पद्धती, हवामान बदलाला तोंड देणाऱ्या तंत्रज्ञानाधारित उपाययोजना आणि मत्स्य व्यवसायातील नवकल्पनांवर विशेष भर दिला जाईल.

दरम्यान, महोत्सवात गोमंतकीय संस्कृतीचे दर्शन घडविणारे लोकनृत्य, स्थानिक बँड्सचे सादरीकरण तसेच मच्छीमारांच्या सन्मानार्थ संगीतकार मुकेश घाटवाल यांनी रचलेले विशेष गीत सादर करण्यात येणार आहे. खाद्यपदार्थांचे स्टॉल्स स्थानिक गोमंतकीयांनाच देण्यात येणार आहेत. त्यातून स्थानिक सहभाग आणि लाभ सुनिश्चित केला जाणार आहे.