World Agricultural Festival : नाशिक, श्री स्वामी समर्थ सेवा व आध्यात्मिक विकास मार्गातर्फे (दिंडोरीप्रणित) शेतकऱ्यांच्या सर्वांगीण प्रगतीसाठी २४ ते २८ जानेवारी या कालावधीत नाशिक येथील डोंगरे मैदान, गंगापूर रोड येथे जागतिक कृषी महोत्सव आयोजित केला आहे.

यानिमित्त २४ रोजी सकाळी कृषी सांस्कृतिक कार्यक्रम होईल. या महोत्सवात गोव्यातील सेवेकरी सहभाग घेतात.

२४ रोजी सकाळी ११ वा. कृषी सांस्कृतिक कार्यक्रम, दुपारी २ वाजता महोत्सवाचे उदघाटन होईल. २५ रोजी सकाळी ११ वा. ‘विषमुक्त शेती’, तर दुपारी २ वाजता ‘दुग्ध व्यवसाय’ विषयावर मार्गदर्शन करण्यात येईल.

२६ रोजी सकाळी ११ वा. ‘पर्यावरण व दुर्ग संवर्धन’ या विषयावर तज्ज्ञ मार्गदर्शन करतील. दुपारी २ वा. स्वयंरोजगार व महिला सक्षमीकरण मेळावा होईल. २७ रोजी सकाळी ११ वा. शेतकरी वधू-वर परिचय मेळावा आयोजित केला आहे.

२८ रोजी सकाळी ११ वा. ‘माहिती तंत्रज्ञान जागृती - सायबर सुरक्षा’ विषयावर तज्ज्ञ मार्गदर्शन करतील. या महोत्सवाचा भाग म्हणून २८ रोजी दुपारी २ नंतर नाशिक येथे सरपंच/ग्रामसेवक मांदियाळीचे आयोजन केले आहे.

यात ग्रामीण भागातील पायाभूत सुविधा, आरोग्य, बालविकास, स्वयंरोजगार या विषयांवर तज्ज्ञ मार्गदर्शन करणार आहेत. शिवाय महोत्सवात दररोज सायंकाळी ६ वा. सांस्कृतिक कार्यक्रम सादर होतील.

हा शेतकऱ्यांसाठी सेवाभावी उपक्रम असून प्रवेश विनामूल्य आहे. महोत्सवात कृषी विविधता एकाच छताखाली, तज्ज्ञांचे मार्गदर्शन, कृषी व खाद्य संस्कृती दर्शन असेल.

शेतकऱ्यांना पर्वणी : आबासाहेब मोरे

श्री स्वामी समर्थ सेवा मार्गाच्या सर्व केंद्रांमार्फत गावोगावी या महोत्सवाच्या निमित्ताने १ ते ७ जानेवारी या कालावधीत कृषी जागर सप्ताह राबवण्यात आला होता.

स्वावलंबी कृषी व्यवसाय, दुग्ध व्यवसाय, कृषिपूरक जोडव्यवसाय यामार्फत उत्पन्नात वाढ कशी करता येईल, या विषयांवर या महोत्सवात तज्ज्ञ मार्गदर्शन करणार आहेत. सर्व शेतकरी बांधवांनी या महोत्सवाचा लाभ घ्यावा, असे आवाहन कृषिरत्न आबासाहेब मोरे यांनी केले आहे.