Goa Water Issue: ओपा येथून तिसवाडीत पाणी पुरवठा करणारी 750एमएम व्यासाची जलवाहिनी सोमवारी सकाळी 7 वाजण्याच्या सुमारास फुटली. त्यानंतर सार्वजनिक बांधकाम खात्याच्या कर्मचाऱ्यांनी हे दुरुस्तीचे काम हाती घेतल्याची माहिती सार्वजनिक बांधकाम खात्याचे कार्यकारी अभियंता निवृत्ती पार्सेकर यांनी दिली.

खांडेपार नदीवर असलेल्या ओपा येथील जलपुरवठा केंद्रातून तिसवाडी तालुका परिसरासाठी ७५० एमएम व्यासाच्या जलवाहिनीतून पाणी आणले जाते. कास्ट आयर्नच्या वाहिन्या असून, अधून-मधून या वाहिन्या फुटण्याचे प्रकार यापूर्वी घडलेले आहेत. आज सकाळी सातच्या सुमारास वाहिनी फुटल्यानंतर त्या वाहिनीतून लाखो लिटर पाणी वाहून गेले.

ओपा केंद्रावरील साबांखा कामगारांना माहिती मिळताच त्यांनी त्याठिकाणी धाव घेतली. पाणी पुरवठा बंद झाल्यानंतर जेसीबीच्या साह्याने वाहिनी जोडण्याचे काम करण्यात आले.

दरम्यान, जलवाहिनी फुटल्यामुळे तिसवाडी तालुक्यातील पाणी पुरवठ्यावर त्याचा परिणाम होणार असून, तिसवाडी परिसरात कमी दाबाने पाणीपुरवठा होणार असल्याचे पार्सेकर यांनी सांगितले.