ओल्ड गोवा: दरवर्षीप्रमाणे जुन्या गोव्यात (३ डिसेंबर) रोजी फेस्त साजरे केले जात आहे. गोव्याच्या फेस्ताच्या चर्चा फक्त राज्यातच नाही तर देशभरात केल्या जातात. आज फेस्ताच्या दिवशी राज्याचे मुख्यमंत्री डॉ. प्रमोद सावंत तसेच इतर पक्षातील कार्यकर्त्यांनी सेंट झेवियर यांचे दर्शन घेतले. यावेळी गोवा फॉरवर्ड पार्टीचे अध्यक्ष विजय सरदेसाई यांनी देखील जुन्या गोव्यातील चर्चला भेट दिली आणि विजय सरदेसाई यांनी दरम्यान केलेली प्रार्थना मात्र सध्या सगळीकडे गाजतेय.

जमलेल्या पत्रकारांशी बोलताना सरदेसाई म्हणाले की, "गोव्यात जोपर्यंत सेंट झेवियर म्हणजेच गोंयचो सायब आहे तोपर्यंत गोवा सुरक्षित आहे अशी श्रद्धा स्थानिकांच्या मनात आहे. गोव्यातील समुदायामध्ये असलेला धार्मिक एकोपा हा कायम असाच राहावा आणि केवळ सायबच गोव्यातील गोंयकारपणाला वाचवू शकतात.

गोव्यातील सरकार राज्यातील शांतता बिघडविण्याचे काम करतंय. गोंयेच्या सायबाने त्यांना माफ करावं आणि गोव्याला चांगलं भविष्य मिळावं" अशी इच्छा विजय सरदेसाईंनी व्यक्त केली.