पणजी : भाटले - पणजी येथील एका चिकन सेंटर दुकानदाराने दोन अल्पवयीन मुलींना आमिष दाखवून त्यांना दुकानात कोंडून विनयभंग केल्याप्रकरणी संशयित तन्वीर अहमद याला काल गुरुवारी संध्याकाळी पणजी पोलिसांनी अटक केली. त्याला पोलिस कोठडीसाठी न्यायालयात उभे करण्यात येणार असल्याची माहिती पोलिसानी दिली.

मिळालेल्या माहितीनुसार दोन अल्पवयीन मुली गुरुवारी संध्याकाळी पाचच्या सुमारास वडाभाव आणण्यासाठी गेल्या होत्या. त्यावेळी या चिकन सेंटर दुकानदाराने त्यांना बोलावून दुकानात नेले. त्यांना खाद्यपदार्थ देऊन त्यांचा विनयभंग केला व दुकानात कोंडून ठेवले. घडल्या प्रकाराची माहिती न सांगण्याची धमकी दिली. भेदरलेल्या अवस्थेत दोन्ही मुली रडत घराकडे आल्या असता त्यांनी घडलेला प्रकार आईला सांगितला.

आईने त्या चिकन सेंटरच्या दुकनदाराला जाब विचारला. यावेळी तेथील इतर दुकानदारांनी तसेच लोकांनी संशयित तन्वीर याला दुकानातून बाहेर काढले व त्याने केलेल्या कृत्याबद्दल बेदम चोप दिला. त्यानंतर त्याला पणजी पोलिसांना बोलावून ताब्यात दिले. पोलिसांनी दिलेल्या माहितीनुसार संशयित तन्वीर अहमद हा मूळचा उत्तरप्रदेशमधील आहे. गेल्या काही महिन्यांपासून तो चिकन सेंटरचे दुकान चालवतो. संध्याकाळच्या सुमारास दुकानात ग्राहक नसल्याने या दोन मुलींचा गैरफायदा घेण्याचा त्याने प्रयत्न केला. मात्र, या मुलींनी त्याचा पर्दाफाश केला. त्याची पार्श्‍वभूमी तपासणीसाठी उत्तरप्रदेशमधील पोलिसांशी संपर्क साधण्यात येणार आहे.