पेडणे: डिंगणे - सिंधुदुर्ग येथे गेलेल्या ‘ओंकार’ हत्तीला सिंधुदुर्ग वन खात्याचे कर्मचारी व स्थानिक लोकांनी एकत्र येऊन परत गोव्याच्या हद्दीत हाकलून लावल्याने हा हत्ती तोरसे येथे पोहोचला आहे. तोरसे येथील रानात सध्या तो स्थिरावला आहे.

४ एप्रिल रोजी मध्यरात्री महाराष्ट्राच्या नेतर्डे गावातून ओंकार हत्ती गोव्याच्या हद्दीतील कडशी - मोपा येथे आला होता. त्यानंतर गेला आठवडाभर मोपा गावाच्या वेगवेगळ्या भागातील रानात फिरत होता. यादरम्यान कडशी-मोपा येथे या हत्तीने दोन वाहनांची मोडतोड केली होती.

त्यानंतर गुरुवार ९ एप्रिल रोजी संध्याकाळी या हत्तीने गोवा महाराष्ट्र हद्दीवरील डिंगणे - सिंधुदुर्ग गावात प्रवेश केला होता. यामुळे पेडणे वन खात्याच्या कर्मचाऱ्यांनी सुटकेचा निःश्वास सोडला होता; पण परत रविवारी रात्री महाराष्ट्राच्या हद्दीवरील लोक व सिंधुदुर्ग वन खात्याच्या कर्मचाऱ्यांनी या हत्तीला परत गोव्याच्या हद्दीत हुसकावून लावल्यामुळे या हत्तीचे आता काय करावे, असा मोठा गहन प्रश्न पेडणे वन कार्यालयापुढे उभा राहिलेला आहे.

गोवा हातावर हात ठेवून; पलीकडून दगड, लाठ्या-काठ्या

या हत्तीला गोव्याच्या हद्दीत पिटाळून लावण्यासाठी सिंधुदुर्ग वन खात्याच्या कर्मचाऱ्यांसोबत गाळेली, नेतर्डे भागातील सुमारे ५० लोक सोबत लाट्या काठ्या मशाली घेऊन होते असे समजते. गोवा महाराष्ट्र हद्दीवरील लोकांनी या हत्तीला आल्या वाटेने परत जाऊ न देता परत गोव्याच्या हद्दीत पिटाळून लावण्याच्या स्वीकारलेल्या आडमुठ्या धोरणामुळे पेडणे वन खात्याचे कर्मचारी हतबल झाले आहेत.