पेडणे : मोपा परिसरात आलेल्या ओंकार हत्तीला महाराष्ट्रात हद्दीत सोडल्याने वन कर्मचारी व स्थानिक लोकांनी सुटकेचा सुस्कारा सोडला असतानाच काल रात्री सिंधुदुर्गातील डिंगणेमार्गे कुमयाचो व्हाळ-तोर्से या गोव्याच्या हद्दीत पोहोचला.

नंतर रात्री या हत्तीने फकिरपाटो येथील सरकारी प्राथमिक शाळेच्या इमारतीजवळील बागायतीत काही केळीची झाडे मोडून टाकली. नंतर रात्रीत हत्तीने मोर्चा धुजगी येथे वळवला. सकाळपर्यंत हा हत्ती येथील पेट्रोलपंपमागील झाडीत होता.

वनाधिकारी व कर्मचारी या हत्तीवर पाळत ठेवून होते. झाडांची बेसुमार कत्तल, डोंगर सपाटीकरण यामुळे हत्ती गावात येत आहेत. लोकवस्तीत येऊ लागले आहेत, असे सामाजिक कार्यकर्ते शंकर पोळजी यांनी सांगितले.

काहीकाळ वाहतूक ठप्प

हत्तीला बघण्यासाठी राष्ट्रीय महामार्गावर वाहने थांबविल्याने काही काळ वाहतूक ठप्प झाली तर कडशी मोपा व धनगरवाडी या वस्तीवर जाणारी वाहतूकही बंद पडली.

तोर्सेत आढळला ‘ओंकार’

हा हत्ती काल संध्याकाळी चारनंतर तोर्से भागातून तो दोन दिवस मोपात जिथे वास्तव्याला होता, तिथे जाण्याच्या प्रयत्नात होता. पण तिळारीचा कालवा मध्ये आल्याने त्याचे प्रयत्न यशस्वी होऊ शकले नाहीत. नंतर तो राजलवाडा तोर्से भागात होता. तिथे त्याने बांबूचा फडशा पाडला. रात्री ८ च्या सुमारास तो रानाकडे गेला.