काणकोण: काणकोणातील सागरी कासव संवर्धन आगोंद व गालजीबाग किनाऱ्यावर आत्तापर्यंत १८७ सागरी कासवांनी १८४७४ अंडी घातली आहेत.

गालजीबाग किनाऱ्यावरील ऑलिव्ह रिडले कासव संवर्धन केंद्रात गालजीबाग येथे राजबाग, कोळंब, पाटणे, बायणा, वार्का बाणावली, मोबोर व तळपण या किनाऱ्यावर घातलेल्या अंड्याचे स्थलांतर केले जाते तर आगोंद किनाऱ्यावर पाळोळे, काब द राम व खोला किनाऱ्यावर घातलेल्या अंड्याचे स्थलांतर करून त्याचे संवर्धन केले जाते.

गालजीबाग किनाऱ्यावर ४३ सागरी कासवांची ४६०३ अंडी घातली, त्यापैकी २३५२ अंड्यातून पिल्ले बाहेर येऊन ती समुद्रात सोडण्यात आली. यावेळी १९१ पिल्ले समुद्रात सोडण्यापूर्वीच मेली. आगोंद किनाऱ्यावर आतापर्यंत १४२ सागरी कासवांचे आगमन होऊन त्यांनी १३७६६ अंडी घातली. त्यापैकी ३८१७ अंड्यातून पिल्ले बाहेर आली.

अन्य किनाऱ्यावर १०५ अंडी होती त्यातील ९७ पिल्ले बाहेर आली दोन्ही किनाऱ्यावरून एकूण ६२६६ पिल्ले समुद्रात सोडण्यात आली. आगोंद किनाऱ्यावरील घरट्यात ८८७ अंडी नाही, तर १११५ पिल्लांना समुद्रात सोडण्यापूर्वीच मरण आले.दोन्ही किनाऱ्यावरील १३११ पिल्लांना मरण आले. ३ मार्चपर्यंत ११० सागरी कासवांचे आगमन आगोंद व ३९ आगमन गालजीबाग किनाऱ्यावर झाले.आगोंद किनाऱ्यावर ११० घरट्यातून ११११४ व गालजीबाग किनाऱ्यावर ३९ घरट्यात ४२४३ अंडी घातलेली होती.

३ मार्चपर्यंत या दोन्ही किनाऱ्यावर १४९ सागरी कासवांचे आगमन होऊन त्यांनी १५३५७ अंडी घातली होती. अठ्ठतीस दिवसात अठ्ठतीस नवीन कासवाचे दोन्ही किनाऱ्यावर आगमन होऊन त्यांनी ३११७ अंडी घातली आहेत. घरट्यातून पिल्ले बाहेर पडण्यासाठी सुमारे ४५ ते ५० दिवसांचा कालावधी लागतो, असे वन खात्याच्या दक्षिण गोवा सागरी झोनचे उपक्षेत्रीय वनाधिकारी राजेश नाईक यांनी सांगितले.

हवामान बदलाचा परिणाम!

कासवाचे आगमन हवामानावर अवलंबून असते. हवामान बदलाचा परिणाम सागरी कासवांच्या आगमनावर होऊ शकतो. मात्र ज्या किनाऱ्यावर ज्या पिल्लांचा जन्म झाला, ती पिलं प्रजाजन सक्षम्य झाल्यानंतर अंडी घालण्यासाठी जन्म घेतलेल्या किनाऱ्यावर येत असतात. राज्यात कासव संवर्धन केंद्र परिसरात कासवांसह अंड्याचे संरक्षण करणे गरजेचे आहे, त्यासाठी सर्वांचे सहकार्य अपेक्षित आहे, असे मत पर्यावरणप्रेमींनी व्यक्त केले.