Olive Ridley: ‘ऑलिव्ह रिडलेंचे’ जतन सागरी परिसंस्थेचे रक्षण करण्यासाठी! मोरजीत कासव संवर्धन चर्चासत्रात मान्यवरांचे प्रतिपादन

पणजी: ऑलिव्ह रिडले समुद्री कासवांचे संवर्धन हे केवळ प्रजातींचे जतन करण्याबद्दल नाही तर संपूर्ण सागरी परिसंस्थेचे रक्षण करण्याबद्दल आहे, ज्याचा थेट परिणाम हवामान आणि मानवी समुदायांवर होतो,असे प्रतिपादन राज्य हवामान बदल कक्षाच्या प्रकल्प शास्त्रज्ञ डॉ. अपूर्वा सावंत यांनी केले.

जागतिक वन्यजीव दिनानिमित्त, विद्या प्रबोधिनी महाविद्यालयाने त्यांच्या निसर्ग क्लबच्या माध्यमातून ऑलिव्ह रिडले समुद्री कासवांच्या संवर्धनावर एक अत्यंत माहितीपूर्ण चर्चासत्राचे आयोजन केले. सदर चर्चासत्र हे कासवांच्या घरट्यांचे प्रमुख ठिकाण असलेल्या टेंबवाडा -मोरजी येथे आयोजित केले होते.

डॉ. सावंत यांनी हवामान बदल आणि वन्यजीव संवर्धन यांच्यातील परस्पर संबंधांबद्दल त्यांचा दृष्टिकोन मांडला. त्यांनी समुद्राचे वाढते तापमान, प्रदूषण आणि किनारपट्टी विकासाचा कासवांच्या घरट्यांवरील परिणामांवर चर्चा केली आणि विद्यार्थ्यांना आणि उपस्थितांना धोक्यात असलेल्या प्रजातींचे संरक्षण करण्यासाठी शाश्वत पद्धतींचा अवलंब करण्याचेही आवाहन केले.

या कार्यक्रमाचा प्रमुख उद्देश हा सागरी जीवनाचे, विशेषतः धोक्यात आलेल्या ऑलिव्ह रिडले समुद्री कासवांच्या प्रजातींचे जतन करून कासवांच्या आवश्यकतेबद्दल जागरूकता निर्माण करणे हा होता. वन्यजीव आणि पर्यावरण-पर्यटन उत्तर विभाग, गोवा राज्य हवामान बदल कक्ष यांच्या सहकार्याने हे चर्चासत्र आयोजित केले होते. ‘निसर्ग क्लब’चे समन्वयक डॉ. उध्दव पोळ यांनी प्रास्ताविक स्वागत केले. आत्माराम गावस, सहयोग पेडणेकर, वनरक्षक शिवानंद गावस, चंदू नाईक, तसेच एव्हलिन डिसिल्वा, प्रतीक शेट्ये,सलोनी काकोडकर उपस्थित होत्या.