पणजी: कोरोनाच्या ओमिक्रॉन संसर्गाची तिसरी लाट ओसरत असून पॉझिटिव्हिटी रेट दोन टक्क्यांच्या खाली आला आहे. तर नव्याने उपचारासाठी भरती होणाऱ्यांची संख्याही आता थांबली आहे. त्यामुळे राज्यातील सर्व व्यवहार शंभर टक्के क्षमतेने सुरू करावेत अशी शिफारस कोरोना संबंधीच्या तज्ज्ञ कमिटी राज्य सरकारला केली आहे. आता कृती दल आणि राज्य सरकारने यावर निर्णय घेणे अपेक्षित आहे.

आज सोमवारी कोरोना संबंधीच्या तज्ज्ञ समितीची बैठक पणजीत झाली. गोवा वैद्यकीय महाविद्यालय आणि रुग्णालयाची डीन डॉ.शिवानंद बांदेकर यांच्या अध्यक्षतेखाली झालेल्या बैठकीला डॉ. शेखर साळकर, डॉ. शिवानंद गवस, डॉ.धनेश वळवईकर, डॉ.संतोष उसगावकर, डॉ.प्रभुदेसाई, डॉ.विनायक बुवाजी, डॉ.विराज खांडेपारकर, डॉ. राताबोली, डॉ.सागर, डॉ.कांबळी, डॉ.उत्कर्ष बेतोडकर यांच्यासह तज्ज्ञ कमिटीचे सतरा डॉक्टर उपस्थित होते.

राज्यातील कोरोनाची तिसरी लाट आता ओसरत आहे. लसीकरणाचे दोन्ही डोस घेतलेल्याची संख्या शंभर टक्क्यांच्या वर गेलेली आहे. पॉझिटिव्हिटी रेट दोन टक्क्यांच्या खाली आला आहे. त्यामुळे राज्यातले सर्व व्यवहार व्यवहार शंभर टक्के क्षमतेने सुरू करावेत असे तज्ञ कमिटीला वाटते. सर्व आस्थापनातील व्यवसाय पूर्ण क्षमतेने सुरू करण्यास हरकत नाही. राज्यातील पंधरा वर्षावरील लोकसंख्या लसीकरणयुक्त आहे. याशिवाय बूस्टर डोस घेण्याचे प्रमाणही वाढले आहे. त्यामुळे घसरलेली अर्थव्यवस्था रुळावर येण्यास मदत होईल असे तज्ज्ञ कमिटीचे मत आहे.

गेल्या 24 तासात कोरोनाचा बळी नसून उपचारासाठीही कोणाला दवाखान्यात भरती केलेले नाही. कोरोना पॉझिटिव्हिटी रेट 1.79 टक्के इतका खाली आला आहे. सक्रिय रुग्णांची संख्या 271 इतकी आहे. तर गेल्या चोवीस तासात नवे 18 बाधित रुग्ण सापडले आहेत.

कोरोनाच्या कोणत्या व्हेरियन्टमुळे राज्यातील लोकांचा मृत्यू झाला याचा अभ्यास होणे गरजेचे आहे. जर 80 टक्के बाधित ओमायक्रोनचे होते तर इतर 20 टक्यांचे काय ? याचा अभ्यास होणे गरजेचे आहे. पंधरवड्यात जीनोम स्कीव्हेलिंगची मशीन दाखल होईल. त्याआधारे कोरोनाच्या व्हेरियन्टचे तपास लागेल. त्यासाठी संपूर्ण डाटा संरक्षित करणे गरजेचे आहे. - डॉ. शेखर साळकर, सदस्य, कृतीदल आणि तज्ञ कमिटी