Goa Kadamba Bus: सर्व प्रमुख कदंब बसस्थानकांवर आता मद्यपी चालकांची चाचणी करण्यासाठी अल्कोमीटरची व्‍यवस्‍था करण्‍यात आली आहे. कदंब वाहतूक महामंडळाने संचालक मंडळाच्या बैठकीत मद्यपी चालकांचे समुपदेशन करण्‍याचा निर्णय घेतला असल्याचे महामंडळाचे महाव्यवस्थापक संजय घाटे यांनी सांगितले.

अलीकडेच काही कदंब बसचालक दारूच्या नशेत रात्रीच्या वेळी बेशिस्तपणे गाडी चालवताना आढळून आले आहेत. भविष्‍यातील संभाव्‍य अपघात टाळण्यासाठी सरकारने या प्रकरांची गंभीर दखल घ्यावी, अशी मागणी प्रवाशांनी केली आहे. याची दखल घेत केटीसीएलने आज सोमवारी संचालक मंडळाची तातडीची बैठक बोलावली.

या बैठकीत महामंडळाचे अध्यक्ष तथा आमदार उल्हास तुयेकर यांनी सर्व प्रमुख कदंब बसस्थानकांवर अल्कोमीटर ठेवण्याचा निर्णय घेतला. तसेच बसचालक दारूच्‍या नशेत असल्‍याचा प्रवाशांना संशय आला तर त्‍यांनाही त्‍याची अल्कोमीटर चाचणी घेण्याची सूचना करता येईल, असे संजय घाटे यांनी सांगितले. वाढते रस्‍तेअपघात टाळणे हेच या मोहिमेचे उद्दिष्‍ट्य आहे, असेही ते म्‍हणाले.