Goa Rain Update 2024
पणजी: ईशान्य मॉन्सूनच्या प्रभावामुळे राज्याला पावसाचा तडाखा बसत आहे. त्यासोबतच नैऋत्य अरबी समुद्रात तयार झालेल्या चक्रीय वाऱ्याच्या प्रभावातून मोठ्या प्रमाणात पाऊस पडला. ऐन दिवाळीत पडलेल्या या पावसामुळे जनजीवन विस्कळीत झाले. शिवाय थंडीनेही हुलकावणी दिली आहे.
सर्वसाधारणपणे तीन इंच आणि त्याहून अधिक पाऊस हा सर्वसाधारणपणे जून-जुलैमध्ये दिवसभरात पडतो; परंतु आता मॉन्सूनोत्तर काळातही एवढ्या मोठ्या प्रमाणात पाऊस पडत असल्याने राज्यात मोठ्या प्रमाणात हवामान बदल जाणवत असल्याची चिंता हवामानतज्ज्ञ व्यक्त करू लागले आहेत.
गेल्या २४ तासांत राज्यात सरसरी एकूण ४३.३ मिमी म्हणजेच १.७० इंच पावसाची नोंद करण्यात आली. शनिवारीही मध्यम पावसाची शक्यता असल्याने गोवा वेधशाळेने ‘यलो अलर्ट’ जारी केला आहे.
मॉन्सूनोत्तर पावसाला सुरुवात झाल्यापासून आतापर्यंत राज्यात एकूण ३४३ मिमी म्हणजेच १३.५१ इंच एवढ्या पावसाची नोंद केली आहे, जो सर्वसामान्य मॉन्सूनोत्तर पावसाच्या तुलनेत तब्बल १०६.५ टक्के अधिक आहे. गेल्या २४ तासांत फोंडा येथे ८७.४ मिमी, मुरगाव ७२.८ मिमी, म्हापसा ६७ मिमी, सांगे ५९ मिमी, वाळपई ५५.४ मिमी, साखळी ४९.६ मिमी, काणकोण ३१.२ मिमी, जुने गोवे २३.४ मिमी, पणजी २२ मिमी, तर मुरगाव येथे २०.८ मिमी पावसाची नोंद केली आहे.
अरबी समुद्रात तयार झालेल्या चक्रीय वाऱ्यामुळे राज्यात पाऊस पडला. खरे तर आता थंडी पडायला सुरुवात व्हायला हवी होती; परंतु अद्याप थंडी सुरू झालेली नाही. हा हवामान बदलांचा परिणाम म्हणू शकतो; परंतु येत्या काही दिवसांत थंडी पडण्याची शक्यता नाकारता येत नाही.डॉ. रमेश कुमार एम. आर., निवृत्त शास्त्रज्ञ, एनआयओ.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.