North Goa Police Conducts Tenant Verification Drive Across Key Areas

पणजी: उत्तर गोव्यात भाडेकरु पडताळणी मोहिमेने पुन्हा एकदा जोर धरला आहे. विविध पोलिस ठाण्यांच्या हद्दीत पोलिसांनी भाडेकरु पडताळणी मोहिम सुरु केली आहे. मोपा, कोलवाळ, म्हापसा, साळगाव पोलिसांनी मोपा, थिवी रेल्वे स्थानक परिसर, म्हापसा बस स्टॉप त्याचबरोबर साळगाव येथील काही प्रभागांमध्ये भाडेकरुंच्या टेनंट फॉर्मची तपासणी केली. टेनंट फॉर्म जमा न केलेल्या भाडेकरुंवर कारवाई करण्यात येणार असल्याची तंबीही देण्यात आली. त्यामुळे भाडेकरुंमध्ये चिंतेचे वातावरण आहे.

आतापर्यंत तब्बल 2.5 लाख घरांची पडताळणी पूर्ण

दरम्यान, राज्यात गोवा भाडेकरु पडताळणी कायद्याची अंमलबजावणी सुरु झाल्यापासून आतापर्यंत तब्बल 2.5 लाख घरांची पडताळणी पूर्ण झाल्याचे सांगण्यात आले आहे. जे घरमालक भाडेकरुंची माहिती देत नाहीत त्यांच्यावर दंडात्मक कारवाईची तरतूद देखील कायद्यात करण्यात आली आहे.

वाढत्या गुन्हेगारीला आळा

राज्यातील वाढत्या गुन्हेगारीला आळा घालण्यासाठी गोवा पोलिस धडक कारवाया करत आहे. दोन दिवसांपूर्वीच, गिरी येथे भाड्याच्या घरात राहून हायड्रोफोनिक वीड्सचे उत्पादन घेणाऱ्या एका व्यक्तीच्या मुसक्या आवळण्यात पोलिसांना यथ आले. यावेळी पोलिसांनी त्याच्याकडून तब्बल 11 कोटींचा अंमलीपदार्थ जप्त केला. त्यामुळे आता पुन्हा एकदा गोवा पोलिसांनी (Goa Police) राज्यात बेकायदा राहणाऱ्यांच्याविरोधात कंबर कसली आहे.