Shripad Naik BJP North Goa Candidate

उत्तर गोवा लोकसभा मतदारसंघाचे भाजप उमेदवार श्रीपाद नाईक यांना मुळगाव येथील जनतेच्या रोषाचा सामना करावा लागला. खाण परिक्षेत्राच्या मुद्द्यावरून आधीच नाराज असलेल्या मुळगावच्या जनतेने खाणीच्या प्रश्नावरून श्रीपाद नाईक यांना कोंडीत पकडले. याप्रश्नी लक्ष घालण्याचा शब्द देऊन श्रीपाद नाईक यांनी कशीबशी एकदाची सुटका करून घेतली.

श्रीपाद नाईक यांनी बुधवारी (दि.03) डिचोली मतदारसंघात झंझावाती प्रचार सुरू केला. गावकरवाडा-डिचोली येथे प्रचारसभा आटोपून श्रीपाद नाईक मुळगाव येथे आले. त्यांच्याबरोबर आमदार डॉ. चंद्रकांत शेट्ये आणि भाजपचे प्रमुख कार्यकर्ते उपस्थित होते.

श्रीपाद नाईक यांची प्रचारसभा सुरू होताच मुळगाववासीयांनी खाण लीज क्षेत्रातून धार्मिक स्थळे आणि घरेदारे बाहेर काढा, अशी मागणी केली. या मागणीबाबत सरकारकडून आश्वासनाशिवाय मिळालेले नाही,असा मुद्दा श्री केळबाय देवस्थानचे अध्यक्ष वसंत गाड यांनी उपस्थित केला.

सध्या खाण व्यवसाय सुरू असून, तिसऱ्या पाळीतही काम सुरू आहे. स्थानिक कामगारांवरही कंपनीने अन्याय केला आहे. आदी मुद्दे वसंत गाड, स्वप्नेश शेर्लेकर आणि इतरांनी श्रीपाद नाईक यांच्यासमोर मांडले. याप्रश्नी मुख्यमंत्र्यांशी चर्चा करून तोडगा काढू,असे आश्वासन देताच मुळगाववासीय शांत झाले.

गाव वाचवा मगच प्रचाराला या!

अगोदर आमचा गाव वाचवा, नंतरच प्रचारासाठी या, असेही लोकांचे म्हणणे होते. मुळगाववासीयांच्या या पवित्र्यामुळे प्रचारसभेवेळी वातावरणही किंचितसे तापले. २ मे पर्यंत जनतेच्या इच्छेप्रमाणे निर्णय व्हावा. अन्यथा मुळगाववासीय वेगळा विचार करतील,असे वसंत गाड यांनी सुनावले.