Chimbel Child Marriage Case Taxi Driver Arrested

फोंडा: अल्पवयीन मुलीशी लग्न करून तिच्याशी शारीरिक संबंध प्रस्थापित केल्यामुळे एका बिगर गोमंतकीय पण सध्या चिंबल येथे राहणाऱ्या टॅक्सीचालकाला पोलिस कोठडीत बसण्याची वेळ आली आहे. फोंडा पोलिसांनी अटक चुकवत फिरणाऱ्या या टॅक्सीचालकाला अटक केली आहे.

पोलिसांनी दिलेल्या माहितीनुसार, या वर्षीच्या शुभारंभीच चिंबल येथे राहणाऱ्या येसूनाथ रामण्णा लकमपूर (२८) हावेरी-कर्नाटक याने कर्नाटक राज्यातीलच एका अल्पवयीन मुलीशी तिस्क-उसगाव येथे लग्न केले.

ही मुलगी लग्न करून येसूनाथ याच्यासोबत चिंबल येथे गेली खरी पण तेथे गेल्यावर येसूनाथचे आधीच एक लग्न झाल्याचे तिला समजल्यानंतर तिने परत आपले कर्नाटकातील मूळ गाव गाठले.

त्यानंतर या प्रकरणाची पोलिस चौकशी झाली असता लग्न तिस्क-उसगाव येथे झाल्यामुळे प्रकरण फोंडा पोलिसांकडे वर्ग करण्यात आले.मोबाईलच्या लोकेशनवरून येसूनाथला फोंडा पोलिसांनी हुडकून काढले आणि अटक केली.

आणखी चौघांवर गुन्हे

सध्या या प्रकरणात येसूनाथ याच्यासह यल्लव्वा लकमपूर (४०) हावेरी-कर्नाटक, लक्ष्मण वडार (६०) व भास्कर वडार (४०) तिस्क - उसगाव, लक्ष्मी वडार (३४) शिरवाड-कारवार यांच्याविरुद्ध गुन्हे नोंदवण्यात आले असून पोलिस पुढील चौकशी करीत आहे.