Mandrem News: मांद्रे पंचायतीचा पोलिस स्थानकाला विरोध नाही. परंतु ती इमारत आपत्कालीन सेवेसाठी उभारली गेली आहे. त्यामुळे ही जागा सध्या आमच्या ताब्यात असून आम्ही अजूनपर्यंत ना हरकत दाखला दिलेला नाही किंवा सरकारने पंचायतीशी कसल्याच प्रकारचा पत्रव्यवहार केलेला नाही.

जर सरकारने पत्रव्यवहार केला असेल तर आपण पंचायत मंडळाच्या बैठकीत हा विषय ठेवणार असल्याची माहिती सरपंच ॲड. अमित सावंत यांनी पत्रकार परिषदेत दिली.

मांद्रे मतदारसंघात खास स्वतंत्र नवीन पोलिस स्थानकाची इमारत जुनस वाडा येथील आपत्कालीन इमारतीमध्ये कार्यान्वित होणार आहे. या इमारतीचा ताबा सध्या मांद्रे पंचायतीकडे आहे. या इमारतीत पोलिस स्थानक सुरू करण्यास मांद्रे पंचायतीने किंवा सरपंचांनी ना हरकत दाखला दिला आहे का? असा सवाल मांद्रे पंचायत मंडळाच्या शनिवारच्या खास बैठकीत पंचसदस्यांनी उपस्थित केला.

जर परवाना दिला नसेल तर तशी माहिती प्रसारमाध्यमांना तुम्ही द्या, अशी आग्रहाची भूमिका पंचमंडळाने सरपंच ॲड. अमित सावंत यांच्याकडे केली. त्यानुसार सरपंच सावंत यांनी शनिवार, ३० रोजी सायंकाळी पंचायत कार्यालयात पत्रकार परिषद आयोजित केली होती. यावेळी व्यासपीठावर पंचसदस्य महेश कोनाडकर, पंच संपदा आजगावकर, पंच मिंगेल फर्नांडिस आदी उपस्थित होते.

याबाबत आम्ही अनभिज्ञच

ॲड. अमित सावंत यांनी सांगितले की, या इमारतीमध्ये पोलिस स्थानक होणार हे आम्हाला माहिती नव्हते. आपण किंवा पंचायतीने कसल्याच प्रकारचे कुणाला ना हरकत दाखले दिलेले नाहीत. या पोलिस स्थानकासाठी आपला विरोध नाही. परंतु सरकारने आजपर्यंत पंचायतीकडे या इमारतीसंबंधी कसलाच पत्रव्यवहार केलेला नाही.

खास बैठकीत काही पंचसदस्यांनी आपल्याला पोलिस स्थानकासाठी इमारतीचा ताबा तुम्ही सरकारकडे दिला आहे का किंवा ना हरकत दाखला दिला आहे का, असा प्रश्न केल्यानंतर आपण त्यांना नाही, असे उत्तर दिले. त्यानंतर एकूण दहाही पंचसदस्यांनी या इमारतीमध्ये पोलिस स्थानक कार्यान्वित करण्यासाठी हरकत असल्याचा ठराव घेतलेला आहे. - ॲड. अमित सावंत, सरपंच