Goa Road Development Proposal : काही दिवसांपूर्वी आपण दिल्लीत केंद्रीय रस्‍ते आणि वाहतूकमंत्री नितीन गडकरी यांची भेट घेत, त्‍यांना गोव्‍यासाठी ७,०७६ कोटींच्‍या रस्‍ते प्रकल्‍पांचे प्रस्‍ताव सादर केलेले आहेत, अशी माहिती सार्वजनिक बांधकाम खात्‍याचे (पीडब्‍ल्‍यूडी) मंत्री दिगंबर कामत यांनी मंगळवारी पत्रकारांशी बोलताना दिली.

आपण काहीच दिवसांपूर्वी दिल्लीचा दौरा करून तेथे केंद्रीय मंत्री नितीन गडकरी यांची भेट घेतली आणि त्‍यांना आगामी काळात गोव्‍यासाठी ७,०७६ कोटींच्‍या रस्‍ते प्रकल्‍पांचे प्रस्‍ताव सादर केले. त्‍यातील बहुतांशी प्रस्ताव सविस्तर प्रकल्प अहवालांसह (डीपीआर) सादर करण्यात आले आहेत.

या प्रकल्पांमध्ये बोरी येथील जोडमार्गांसह पूल, गोवा-कर्नाटक सीमेवरील तसेच मोलेतील मार्गाचे चौपदरीकरण, मोले-खांडेपार मार्गाचे चौपदरीकरण, याशिवाय मडगाव, आर्ले येथील महामार्गांच्‍या चौपदरीकरणाचाही समावेश आहे. यातील अनेक कामे पुढील काहीच वर्षांत सुरू होतील, असेही मंत्री कामत यांनी सांगितले.

पंतप्रधान नरेंद्र मोदींच्‍या नेतृत्‍वाखालील एनडीए सरकार केंद्रात सत्तेवर आल्‍यापासून आणि रस्‍ते आणि महामार्ग मंत्रालयाचा ताबा मंत्री नितीन गडकरी यांच्‍याकडे आल्‍यापासून गोव्‍यात हजारो कोटींच्‍या रस्‍त्‍यांची कामे झालेली आहेत.