पणजी: औद्योगिक विकास महामंडळाने (आयडीसी) राज्यात एकही चांगले काम केलेले नाही. उद्योग वाढावेत अशीच सर्वांची इच्छा असते. परंतु वेर्णा येथील जागा गोदामांसाठी दिल्या गेल्या आहेत. गोदामे उभारणे हा काही उद्योग नाही. गोदाम उभारून ती भाड्याने दिली जातात. त्यामुळे गोदामांसाठी मोठी जागा देऊ नये, असे नीलेश काब्राल यांनी विधानसभेत सांगितले.

गणेश गावकर आयडीसीचे चेअरमन असताना उच्च न्यायालयाच्या सूचनेनुसार आम्ही ‘आयपीबी’साठी जागा घेतली होती. काकोडा औद्योगिक वसाहतीती अनेक उद्योगांना जागा दिल्या. पण तेथे उद्योग सुरूच झाले नाहीत. औद्योगिक वसाहतीतील रस्त्यांची स्थिती बिकट झाली आहे, हे काब्राल यांनी सभागृहाच्या निदर्शनास आणून दिले. औद्योगिक वसाहती या केवळ गोदामांसाठी नाही, तर तेथे उद्योग उभारले जावेत. आयडीसीच्या कार्यालयांत अपुरा कर्मचारी वर्ग आहे, याकडेही त्‍यांनी लक्ष वेधले.

वाहतूक खात्याचे प्रशिक्षण केंद्र फोंड्यात उभारले जाणार असल्याचे तीन वर्षांपूर्वी जाहीर केले होते, त्याचे काय झाले, याचे उत्तर मंत्र्यांनी द्यावे. वाहने मोडित काढल्यानंतर त्यांना नवे वाहन खरेदी करताना सवलत देणारी योजनेचे काय झाले? असा सवालही काब्राल यांनी उपस्‍थित केला.