New Borim Bridge Loutolim Farmers Hearing NGT

सासष्टी: नवीन बोरी पुलासंदर्भात लोटली येथील शेतकऱ्यांनी राष्ट्रीय हरित लवादाकडे भू संपादनाबाबत न्याय मिळवण्यासाठी अर्ज केला होता. या अर्जावरील सुनावणी २ डिसेंबर रोजी निश्चित करण्यात आली होती; पण लवादाने यावरील सुनावणी ७ जानेवारी २०२५ पर्यंत पुढे ढकलण्याचा आदेश जाहीर केला.

याप्रकरणी गोवा सरकारी वकिलाने शेतकऱ्यांच्या अर्जावर स्पष्टीकरण देण्यास थोडा वेळ मागितला. दोन्ही पक्षकारांचे म्हणणे ऐकून घेतल्यावर लवादाने सुनावणी पुढे ढकलली.

नवीन बोरी पुलासाठीच्या जमीन संपादन प्रक्रियेला स्थगिती द्यावी, असा अर्ज शेतकऱ्यांनी केला आहे. त्याचबरोबर सरकारने नवीन बोरी पुलाचा आराखडा बदलावा व पूर्वीच्या आराखड्याचा पुनर्विचार करून या पुलासाठी दुसरीकडून जमिनीची निवड करावी, असेही शेतकऱ्यांचे म्हणणे आहे. तसेच ईआयए अधिसूचना २००६ अंतर्गत प्रथम पर्यावरण मंजुरी मिळविल्याशिवाय हा प्रकल्प पुढे नेऊ नये, अशीही शेतकऱ्यांची मागणी आहे.

आता शेतकऱ्यांनी यासंदर्भात कडक पावले उचलण्याचा निर्णय घेतला असून उच्च न्यायालयात दाद मागण्यासाठी ते अर्ज करणार असल्याचे सांगण्यात येत आहे. राज्य सरकार या प्रकरणात सध्या मुद्दामहून चालढकलीचा प्रकार करीत असल्याचे शेतकऱ्यांचे म्हणणे आहे.

राष्ट्रीय हरित लवाद २ रोजीच याप्रकरणी आपला आदेश देणार, असे शेतकऱ्यांना वाटत होते. मात्र, लवादाने सुनावणी पुढे ढकलल्याने शेतकरी निराश झाले आहेत.