New 8 Wetlands To Be Declared in Goa: गोवा राज्य सरकारने पाणथळ जमीन (संवर्धन आणि व्यवस्थापन) नियम, 2017 च्या नियम 7 अंतर्गत एक मसुदा अधिसूचना जारी केली आहे. त्यानुसार नवीन 8 नवीन जागा पाणथळ म्हणून घोषित करण्यात येणार आहेत.

मसुदा अधिसूचनेचा उद्देश संबंधित स्थळांच्या पर्यावरणीय वैशिष्ट्यांची जपणूक करणे, संवर्धन करणे आणि उक्त जलस्रोतांच्या हद्दीतील तसेच प्रभाव क्षेत्रामध्ये विकास कामांचे नियमन करणे हा आहे.

यात वास्कोमधील मायमोल्ले तलाव (2,66,627 चौरस मीटर क्षेत्रफळ), वेर्णा येथील अंबुलोर तलाव (5,393 चौ. मीटर), राया येथील बाकभट्ट तलाव (75,009 चौ. मीटर), बेबकी, (10,525 चौ.मी.), बाणावली येथील कमला तलाव (8,050 चौ. मीटर), सासष्टी तालुक्यातील लागोआ डी सिमा तलाव (1,56,686 चौ. मीटर), डिचोलीतील लामगाव तलाव (3,375 चौ. मीटर), शिरोड्यातील मोईंगल तलाव (2,717 चौ. मी.) आणि कुठ्ठालीतील वोडले धाकटे तलाव (87,126 चौ.) या तलावांचा समावेश आहे.

पर्यावरण आणि हवामान बदल विभागाच्या गोवा राज्य पाणथळ प्राधिकरणाच्या (GSWA) 13 व्या बैठकीत या तलावांना पाणथळ म्हणून घोषित करण्याचा निर्णय घेण्यात आला. जलकुंभांना पाणथळ म्हणून घोषित करण्यापूर्वी सरकारने नागरिकांसाठी 60 दिवसांची नोटीस दिली आहे.

या तलावांच्या हद्दीत कोणत्याही प्रकारच्या अतिक्रमणावर बंदी घालण्यात आली आहे. विचाराधीन जमिनीच्या पर्यावरणीय समतोलावर परिणाम होणार नाही, अशा विद्यमान उद्योगांच्या आधुनिकीकरणाचा अपवाद वगळता कोणताही उद्योग उभारण्यास अथवा कचऱ्याची विल्हेवाट लावण्यास देखील या जमिनीत बंदी असेल.

या तलाव क्षेत्रात बोट जेटी, वाळू उत्खनन, शिकार, पर्यावरणास अडथळा ठरेल असे कोणतेही कायमस्वरूपाचे बांधकाम प्रतिबंधित आहे.