Goa Shipyard Limited : गोवा शिपयार्ड लिमिटेडच्या कर्मचार्‍यांना न्याय देण्यासाठी आणि त्यांच्या हक्कांचे संरक्षण करण्यासाठी नव्या युनियनची स्थापना करण्यात आली आहे. पौर्णिमा सावंत यांच्या अध्यक्षतेखाली 'युनायटेड गोवा शिपयार्ड लिमिटेड एम्प्लॉईज युनियन' नावाची ही नवीन युनियन स्थापन करण्यात आली आहे.

नव्याने स्थापन झालेल्या युनियनची वार्षिक सर्वसाधारण सभा गुरुवारी 18 ऑगस्ट रोजी वास्कोतील नवेवाडे येथील श्री राष्ट्रोळी जय संतोषी माता मंदिराच्या सभागृहात आयोजित करण्यात आली होती. ज्याला गोवा शिपयार्ड लिमिटेडमधील युनियनच्या पहिल्या महिला अध्यक्ष पौर्णिमा सावंत यांनी संबोधित केले. सल्लागार कॅप्टन जेराल्ड फर्नांडिस यांनीही आपले विचार मांडले. युनियनच्या पहिल्या सर्वसाधारण सभेला 200 हून अधिक कर्मचारी उपस्थित होते.

मीडियाशी बोलताना युनियनच्या अध्यक्षा पौर्णिमा सावंत यांनी आरोप केला की जीएसएलची पूर्वीची युनियन कर्मचाऱ्यांच्या हक्कांचे संरक्षण करण्यात अपयशी ठरली आहे आणि कर्मचाऱ्यांना भेडसावणाऱ्या समस्या सोडविण्याची तसदी घेतली नाही असे त्या म्हणाल्या.