Goa Accident : राज्यात यंदाच्या वर्षी सुरु असलेलं अपघातसत्र अजून संपताना दिसत नाही. प्रत्येक दिवशी किंवा एक दिवसाआड रस्ता अपघातात बळी जात आहे. गेल्या तीन महिन्यात (एप्रिल ते जून 2022) या काळात 802 अपघातांची नोंद झाली आहे. या अपघातात 59 जणांचा मृत्यू झाला आहे. त्यामध्ये दुचाकीस्वारांची संख्या 41 म्हणजेच 70 टक्के इतकी आहे. त्यामुळे राज्यात प्रत्येक 3 दिवसामागे दोघांचा मृत्यू होत आहे.
अपघातसत्र रोखण्यासाठी पोलिसांनी वळोवेळी अधुनमधून वाहन चालकांविरुद्ध विविध मोहीम आखल्या असल्या तरी रस्ता अपघातात मृत्यू होण्याचे प्रमाण मात्र कमी होत नाही असेच या एकंदर स्थितीवरून दिसून येत आहे. मे 2022 या महिन्यात 30 जणांचा रस्ता अपघातात बळी गेला आहे. दुचाकी अपघातात 41 जण मृत्यू झाले आहे त्यात 36 जण चालक व 5 सहचालकांचा समावेश आहे. याव्यतिरिक्त रस्त्यावरून जाणाऱ्या 5 पादचाऱ्याचा वाहनाची ठोकर बसून मृत्यू झाला आहे. या तीन महिन्याच्या काळात वाहतूक खात्याने 2,318 जणांविरुद्ध नियमांचे उल्लंघन केल्याप्रकरणी दंडात्मक कारवाई केली आहे.
हाती आलेल्या आकडेवारीनुसार एप्रिल महिन्यात 242 अपघात, तर मे महिन्यात 321 आणि जूनमध्ये 239 अपघातांची नोंद करण्यात आली आहे. तर 911 जणांवर एप्रिलमध्ये पोलिसांकडून कारवाई करण्यात आली होती, तर मे महिन्यात 869 आणि जून महिन्यात 538 जणांवर वाहतुकीचे नियम मोडल्याप्रकरणी दंडात्मक कारवाई करण्यात आली. या तीन महिन्यांमध्ये झालेल्या अपघातांमध्ये एप्रिल महिन्यात 11 भीषण, 16 गंभीर, 43 किरकोळ अपघात झाले, तर 21 जण गंभीर जखमी आणि 49 किरकोळ जखमी झाले.
मे महिन्यात 28 भीषण अपघात, 15 गंभीर, 65 किरकोळ, तर 18 गंभीर जखमी आणि 77 किरकोळ जखमी झाले. जून महिन्यात 18 भीषण, 15 गंभीर, 43 किरकोळ अपघातांची नोंद झाली, तर 19 जण गंभीर जखमी आणि 76 किरकोळ जखमी झाले आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
