Goa Gets Dedicated Narcotics Control Bureau Office

पणजी: दिल्लीत कोट्यवधी रुपयांचे अमली पदार्थ जप्त करण्यात आल्यानंतर केंद्र सरकारने गोवा राज्याकडे लक्ष केंद्रित केले आहे. नार्कोटिक्स कंट्रोल ब्युरो या सरकारी यंत्रणेचे गोव्यातील कार्यालय मुंबई विभागीय कार्यालयाच्या अंतर्गत काम करत होते तर आता गोव्यासाठी स्वतंत्र विभागीय कार्यालय सुरू करण्यात आले आहे.

या कार्यालयाच्या क्षेत्रात महाराष्ट्र आणि कर्नाटकातील दोन जिल्ह्यांचा समावेश करण्यात आला आहे. सूत्रांकडून मिळालेल्या माहितीनुसार, अमली पदार्थ तस्करीत परदेशी नागरिकांच्या सहभागाने सरकारी यंत्रणांच्या चिंतेत वाढ झाली आहे.

परदेशातून अमली पदार्थ तस्करीसाठी कुरिअर सेवा वापरली जात असल्याचे समोर आले आहे. याचा शोध घेण्यासाठी एनसीबी अधिकाऱ्यांनी गेल्या बुधवारी कुरिअर सेवांच्या प्रतिनिधींसोबत याबाबत बैठक घेतली होती. एनसीबीने गेल्या दोन वर्षांत २१ प्रकरणांमध्ये ४७ जणांना अटक केली आहे, त्यात ३४ भारतीयांचा समावेश आहे.

हैदराबादमधील अटक आणि त्यानंतरच्या चौकशीदरम्यान, गोव्यातून अमली पदार्थ हैदराबादमध्ये पाठवले जात असल्याचे पुरावे मिळाले आहेत. हैदराबाद नार्कोटिक्स एनफोर्समेंट विंगच्या अधिकाऱ्यांनी याबाबतची माहिती तेथील माध्यमांना दिली आहे. गोव्यात अमली पदार्थ थांबवणे आमच्या अधिकारात नाही; परंतु हैदराबादमध्ये अमली पदार्थ रोखण्याचे आमचे कर्तव्य आहे, असे त्या अधिकाऱ्यांचे म्हणणे आहे.