कुंकळ्ळी: “गोव्याचे भविष्य नव्याने घडवायचे असेल, तर विरोधकांची एकजुट हाच एकमेव मार्ग आहे. माझ्यासाठी गोवा हे पहिले प्राधान्य आहे. गोव्याला आज स्वच्छ, पारदर्शक आणि प्रामाणिक राजकारणाची गरज आहे. आपण सर्व भेदभाव विसरून एकत्र आलो, तर ही एकजूट भविष्यात मोठा बदल घडवू शकते, असे विरोधी पक्षनेते युरी आलेमाव यांनी आपल्या वाढदिनी सांगितले.

युरी आलेमाव यांनी आपल्या वाढदिनी नवा गोवा घडविण्याचा केलेला संकल्प आज राजकीय पातळीवर चर्चेचा ठरला. कारण मंचावर फक्त शुभेच्छुक नव्हते, तर एकाच व्यासपीठावर उभे होते विविध पक्षांचे आघाडीचे नेते.

विरोधकांचा एकत्रित फोटोच सत्ताधाऱ्यांची झोप उडवणारा ठरू शकतो, असेही युरींनी यावेळी सांगितले. यावेळी त्यांनी सर्व विरोधी पक्षांना एकत्र येण्याचे आवाहन केले. कार्यकर्ते, सामान्य समर्थक आणि तळागाळातील युवकांनी युरींच्या वाढदिनाच्या कार्यक्रमास मोठी गर्दी केली होती.

दरम्यान, कार्यक्रमाला अखिल भारतीय काँग्रेसचे गोवा प्रभारी माणिकराव ठाकरे, काँग्रेस प्रदेशाध्यक्ष अमित पाटकर, माजी अध्यक्ष गिरीश चोडणकर, गोवा फॉरवर्डचे आमदार विजय सरदेसाई, आमदार कार्लुस फेरेरा, आमदार एल्टन डिकॉस्टा, आमदार वीरेश बोरकर, आरजी प्रमुख मनोज परब, काँग्रेस गटाध्यक्ष आणि कार्यकर्त्यांची मोठी उपस्थिती होती. युरी आलेमाव पुढे म्हणाले, की माझ्यासाठी गोवा प्रथम आहे. सर्वांनी एकत्र येऊन गोवा जिंकण्याची गरज आहे.