पणजी: मांडवी नदीच्‍या किनारी कॅसिनोसमोरच्या कठड्यावर झोपलेल्या एका तरुणाचा तोल जाऊन पाण्यात पडून बुडाल्‍याने मृत्यू झाला. ही घटना बुधवारी पहाटेच्या सुमारास घडली. नदीत पडलेल्या या तरुणाला वाचवण्यासाठी तेथे जवळच मासेमारी करणाऱ्या युवकांनी धावपळ केली. त्याला गोमेकॉ इस्पितळात उपचारासाठी नेले. परंतु डॉक्टरांनी त्‍याला मृत घोषित केले.

मिळालेल्‍या माहितीनुसार, दोनपावला येथे एका भाड्याच्या खोलीत राहणारा बिरेंद्र सिंग बोरा (३५) हा नेपाळी युवक काल रात्री तरंगत्या कॅसिनोवर गेला होता. त्याच्या हातात कॅसिनोचा एंट्री बेल्ट होता. कॅसिनोमधून आज बुधवारी पहाटेच्या सुमारास तो बाहेर आला व तेथीलच नदीच्‍या किनारी कठड्यावर झोपला.

दरम्‍यान, पोलिसांनी बिरेंद्र सिंग बोरा याच्‍या अंगावरील कपड्यांची तपासणी केली असता त्याच्या खिशात एक कार्ड सापडले. त्यावर त्याचे नाव व राहत असलेला दोनापावल येथील पत्ता होता. त्यावरून त्याची ओळख पटली.

मच्‍छीमारांचे प्रयत्‍न ठरले व्‍यर्थ

बिरेंद्र बोरा हा मद्यावस्थेत असण्याची शक्यता आहे. त्‍यामुळे त्याचा तोल गेला आणि पाण्यात पडला असावा. पाण्याची पातळी किनारी अधिक असल्याने तो बुडूनच राहिला. हा प्रकार तेथूनच काही अंतरावर मासेमारी करत असलेल्या तरुणांनी पाहिला व त्याला पाण्यातून बाहेर काढले. नंतर त्याला १०८ रुग्णवाहिकेने गोमेकॉ इस्पितळात नेण्यात आले.

पणजीत रेस्टॉरंटमध्ये करायचा काम

पोलिसांनी मयत बिरेंद्र सिंग बोरा याच्या नेपाळ येथील कुटुंबीयांशी संपर्क साधण्याचा प्रयत्न सुरू केला आहे. मात्र अजूनही त्याची माहिती मिळालेली नाही. तो पणजीतीलच एका रेस्टॉरंटमध्ये काम करत होता व भाडेपट्टीच्या खोलीत एकटाच राहत होता. मृतदेहाचा पंचनामा करून तो शवागारात ठेवण्यात आला आहे. शवचिकित्सा अहवालानंतरच त्याच्या मृत्यूमागील कारण स्पष्ट होईल. पोलिस निरीक्षक विजय चोडणकर यांच्‍या मार्गदर्शनाखाली अधिक तपास सुरू आहे.