मांद्रे: मांद्रे येथील जूनस नदीच्या-बॅकवॉटरमध्ये शनिवारी (28 जून) दुपारी 3 वाजण्याच्या सुमारास झालेल्या अपघातात एका नेपाळी कामगाराचा पाण्यात बुडून मृत्यू झाला. तो आणि त्याचा साथीदार दारुच्या नशेत छोट्या बोटीने प्रवास करत होते. बोट उलटल्यानंतर एकाने झाडाच्या फांद्यांना पकडून जीव वाचवला, तर दुसऱ्याचा पाण्यात बुडून मृत्यू झाला. मृत व्यक्तीची ओळख अद्याप स्पष्ट झालेली नसली, तरी तो मांद्रेतील एका हॉटेलमध्ये सुरक्षा रक्षक म्हणून काम करत होता. तो आणि त्याचा सहकारी दोघेही मूळचे नेपाळचे असून काही काळापासून गोव्यात काम करत होते.

स्थानिक सूत्रानुसार, त्यांना बोट चालवण्याचा कोणताही अनुभव नव्हता. तरीही दोघांनी दुपारी मद्यधुंद अवस्थेत बॅकवॉटरमध्ये बोट घेऊन प्रवास सुरु केला. काही अंतर गेल्यानंतर बोट अचानक असंतुलित होऊन उलटली. त्यात एक जण पाण्यात बुडाला. अपघाताची माहिती मिळताच गावचे सरपंच रॉबर्ट फर्नांडिस यांनी स्वतः शोधमोहीम सुरु केली. त्यांना पंच सदस्य रोजा फर्नांडिस आणि इतर स्थानिक रहिवाशांनी मदत केली. काही वेळाने स्थानिक बचाव पथकाने मृतदेह हाती लागेपर्यंत शोधमोहीम सुरु ठेवली.

दरम्यान, घटनेने परिसरात हळहळ व्यक्त करण्यात येत असून मद्यप्राशन करुन बेकायदेशीररीत्या जलप्रवास करणे किती धोकादायक ठरु शकते, याचे हे उदाहरण ठरले आहे. पोलीस अधिक तपास करत आहेत.

प्रमुख मुद्दे

मृत तरुण वाचलेल्याच्या तरुणाच्या हॉटेलमध्ये सुरक्षा रक्षक म्हणून कार्यरत होता.

दोघांनी बेकायदेशीररीत्या बोट जलप्रवासासाठी वापरली.

बोट उलटल्यानंतर एकाने झाडाच्या फांद्यांना पकडून जीव वाचवला, दुसरा पाण्यात बुडाला.

स्थानिक सरपंच आणि रहिवाशांनी तातडीने मदतकार्य राबवले.

पोलीस (Police) तपास सुरु असून मृतदेह पोस्टमार्टमसाठी पाठवण्यात आला आहे.