पणजी: गोवा विधानसभा निवडणुकीत झालेल्या पराभवाच्या कारणांचे विश्लेषण करण्यासाठी तृणमूल काँग्रेस (TMC) आणि राष्ट्रवादी काँग्रेस पक्षाच्या (NCP) नेत्यांनी आज पणजीत स्वतंत्रपणे त्यांच्या उमेदवारांच्या बैठका बोलावल्या आहेत. विधानसभा निवडणुकीत तृणमूल आणि राष्ट्रवादी काँग्रेसला एकही जागा जिंकता आली नाही.

निवडणुकीसाठी तृणमूलने महाराष्ट्रवादी गोमंतक पार्टीशी युती केली होती, तर राष्ट्रवादी कॉंग्रेस (NCP) आणि शिवसेनेने (Shiv Sena) ही निवडणूक एकत्र लढवली होती. तृणमूलच्या पुनरावलोकन समितीमध्ये अशोक तन्वर यांच्यासह राज्यसभा खासदार सुष्मिता देव आणि सौरव चक्रवर्ती यांचा सह-प्रभारी म्हणून समावेश आहे. तृणमूलचे सर्व उमेदवार,सदस्य बैठकीला उपस्थित राहणार असल्याचे सांगितले जात आहे. दरम्यान राज्यसभा खासदार डेरेक ओब्रायन यांच्यासह तृणमूलचे (TMC) प्रमुख नेते सदस्यांसोबत वन-टू-वन बैठक घेतील.

राष्ट्रवादीचे प्रदेशाध्यक्ष जोस फिलिप डिसोझा यांनी सांगितले की, शनिवारी पक्षाच्या मुख्य कार्यालयात पक्षाचे उमेदवार, कार्यकर्त्यांसह प्रदेश कार्यकारिणीची संयुक्त बैठक होणार आहे.