पणजी: अमली पदार्थ नियंत्रण कक्षाने (एनसीबी) केलेल्या ५३२ ग्रॅम ‘मेथमफेटामाइन’ जप्ती प्रकरणातील मुख्य आरोपी जतन सिंग याला म्हापसा जिल्हा व सत्र न्यायालयाने पुन्हा एकदा दणका दिला आहे. आरोपीने जामिनासाठी केलेला चौथा अर्ज अतिरिक्त जिल्हा व सत्र न्यायाधीश अपूर्वा नागवेकर यांनी फेटाळून लावला.

जप्त करण्यात आलेले अमली पदार्थ व्यावसायिक प्रमाणापेक्षा तब्बल दहापट अधिक असल्याचे न्यायालयाने स्पष्ट केले. २७ मार्च २०२४ रोजी एनसीबीने मिळालेल्या गुप्त माहितीच्या आधारे कांदोळी भागात एका पांढऱ्या रंगाच्या कारला अडवले होते. या कारमधील चालक आणि समोरच्या सीटच्या मधल्या भागात एका प्लास्टिक पिशवीत ५३२ ग्रॅम मेथमफेटामाइन सापडले होते.

या प्रकरणी जतन सिंग याला अटक करण्यात आली असून त्याच्यावर एनडीपीएस कायद्याच्या कलम ८(सी), २२(सी), २३(सी) आणि २९ अंतर्गत गुन्हा नोंदवण्यात आला आहे. आरोपीतर्फे वकिलांनी युक्तिवाद केला की, रासायनिक विश्लेषकाने जप्त केलेल्या एकूण साठ्यापैकी केवळ ०.९७ ग्रॅम नमुन्याचीच चाचणी केली आहे. तसेच पुराव्यांमध्ये काही तांत्रिक त्रुटी असल्याचा दावा करत त्यांनी नवीन परिस्थितीनुसार जामीन देण्याची मागणी केली होती.