आज गोवा फॉरवर्डचा मोर्चा पोलिस निरीक्षक कपिल नायक यांनी अडविल्यामुळे त्यांच्यात आणि विजय सरदेसाई यांच्यात बराच वेळ शाब्दीक वाद झाला. यावेळी सरदेसाई यांनी निरीक्षक नायक हे दामू नाईक यांचे एजंट असून त्यांनी महिला मोर्चेकऱ्यावर हात घातला, असा आरोप केला. हा आरोप नायक यांनी फेटाळून लावताना तुमच्या राजकारणासाठी (Politics) लोकांना वेठीस धरू नका असे बजावले. रस्ता अडवल्यामुळे कित्येक लोकांना त्रास झाला. त्यात एक गरोदर महिलाही अडकली. शेवटी वाहतुकीची कोंडी सोडवून तिला इस्पितळात नेण्यासाठी वाट करून दिली.

याविषयी विजय सरदेसाई (Vijay Sardesai) यांना विचारले असता, आमचा रस्ता अडवण्याचा कुठलाही कार्यक्रम नव्हता. आम्ही सार्वजनिक बांधकाम खात्याच्या कार्यालयात जात होतो. पोलिसांनी आम्हाला अडवून धक्काबुक्की केल्यानेच रस्त्यावर गोंधळ झाला व वाहतूक कोंडी झाली. याला पोलिसच जबाबदार आहेत. निरीक्षक नायक यांच्याविरुद्ध महिला आयोग आणि मानवाधिकार आयोगाकडे तक्रार करू. पोलिसांनी जी बेहिशेबी माया जमविली आहे त्याचाही आम्ही आता शोध घेण्यास सुरवात करू, असे सरदेसाई यांनी सांगितले. दरम्यान, पोलिस (police) निरीक्षक नायक यांनी रस्ता अडविल्याबद्दल कुणावरही गुन्हा नोंद केलेला नसल्याचे सांगितले.