सार्वजनिक मालमत्तेचं विद्रूपीकरण, पाठपुराव्यामुळे कारवाई; योगेश केळकर

म्हापसा : गोवा राज्यातील पूल, भिंती आणि उड्डाणपूल यांसारख्या सार्वजनिक स्थानांवर काही राजकीय पक्षांनी स्टिकर्स चिकटवून विद्रूपीकरण केल्याप्रकरणी, राज्य शासनाने केलेल्या कारवाईचे स्वागत करून, ‘ॲक्टिव्ह म्हापसा सिटिझन्स असोसिएशन’ने (आमका) सातत्याने केलेल्या पाठपुराव्यामुळेच ही कारवाई सुरू झाली. असा दावा या संघटनेचे अध्यक्ष योगेश केळकर (Yogesh Kelkar) यांनी केला आहे.

योगेश केळकर यांनी 11 डिसेंबर रोजी सर्वप्रथम सोशल मीडिया (Social media) आणि प्रिंट मीडियावर हा मुद्दा उपस्थित केला होता. ‘आमका’च्या सदस्यांनी या प्रकरणाचा सातत्याने पाठपुरावा केला आणि 21 डिसेंबर रोजी जिल्हाधिकारी कार्यालयाला पत्र देऊन या प्रकरणी कठोर कारवाई करण्याची विनंती केली. त्यानंतर त्यांनी याविषयी जिल्हाधिकाऱ्यांची भेट घेतली होती.

या पाठपुराव्याच्या परिणामाची माहिती देताना योगेश केळकर म्हणाले, आम्ही केलेल्या पत्रांची अधिकाऱ्यांनी दखल घेतली आहे, याचा आम्हाला आनंद आहे आणि मुख्यमंत्री (CM) डॉ. प्रमोद सावंत (Pramod Sawant) यांनी अधिकाऱ्यांना कारवाई करण्याचे निर्देश दिल्याबद्दल आम्ही आभारी आहोत. ’’ते पुढे म्हणाले, की आम्ही कोणत्याही राजकीय पक्षाच्या विरोधात नाही, असेही योगेश केळकर म्हणाले.

‘आम्ही गोवावासीयांसाठी कार्यरत’

आम्ही गोवा (goa) आणि गोवावासीयांसाठी कार्यरत आहोत आणि गोव्याची संस्कृती आणि अस्मिता जपण्यासाठी आम्ही सदैव प्रयत्नशील राहू. ‘गोयंकारपण’ हा शब्द केवळ घोषणा किंवा टॅगलाइन म्हणून न वापरता, गोवावासीयांच्या विचारांतून आणि कृतीतून ते प्रतिबिंबित झाले पाहिजे, असेही योगेश केळकर म्हणाले.