मडगाव: नावेली येथील एडबर्ग पेरेरा या युवकाला मडगाव पोलिस ठाण्यात आणून बेदम मारहाण करणे उपनिरीक्षक नीलेश शिरवईकर याला बरेच भोवले असून, शिस्‍तभंगाची कारवाई म्‍हणून त्याला सेवेतून निलंबित करण्‍यात आले आहे. वास्‍तविक ही घटना दडपून टाकण्‍याचा प्रयत्‍न झाला होता. मात्र, ‘दैनिक गोमन्तक’ने या अत्याचाराच्‍या प्रकरणाला वाचा फोडली होती. त्‍यानंतर या उपनिरीक्षकावर आता कारवाई करण्‍यात आली आहे.

दक्षिण गोवा पोलिस अधीक्षक टिकम सिंग वर्मा यांच्याशी संपर्क साधला असता, शिरवईकर याला निलंबित केल्‍याच्‍या वृत्ताला त्‍यांनी दुजोरा दिला. या पोलिस कोठडीतल्‍या मारहाणप्रकरणी केलेल्‍या प्राथमिक पोलिस चौकशीत शिरवईकर हा दोषी आढळून आला. त्याच्यावर वरील कारवाई केली असून, आता त्याच्याविरुद्ध खात्याअंतर्गत चौकशी केली जाईल, अशी माहिती वर्मा यांनी दिली.

बुधवारी रात्री मारहाणीची ही घटना घडली होती. नावेली येथे पेरेरा हा दारूच्या नशेत दंगामस्ती करीत होता. याबाबत पोलिसांत तक्रार आल्यानंतर घटनास्थळी जाऊन त्याला ताब्यात घेऊन पोलिस ठाण्यात आणले होते. ठाण्यातही तो मस्ती करू लागला व पोलिसांना शिविगाळ करू लागला. यावेळी पोलिसांनी त्याला मारहाण केली. यात तो जखमी झाला होता. मागाहून त्याला गोमेकॉत दाखल केले होते.

कायद्याचे उल्लंघन!

या युवकाला पोलिस ठाण्यात आणताना त्याला बेड्या ठोकल्या होत्या. कायद्याने तसे करता येत नाही. चौकशीत ही बाब उघड झाली आहे. एडबर्ग याच्यावर सध्या गोमेकॉत उपचार सुरू असल्याची माहिती अधीक्षक वर्मा यांनी दिली. तपासणीनंतर त्याच्या मेंदूत रक्ताच्या गाठी तयार झाल्याचे निदान गोमेकॉतील डॉक्‍टरांनी केले होते.