मडगाव : बेले नावेली येथे रस्ता ओवलांडणाऱ्या मुलाला कारची धडक बसल्याने त्याचे निधन झाले आहे. अपघातादरम्यान बघ्यांनी गर्दी केल्यामुळे रोडवर मोठ्या प्रमाणात वाहतूक जाम झाली होती. या प्रकरणी मडगाव (Margao) पोलिसांनी कार चालवणाऱ्या महिलेवर गुन्हा नोंद केला आहे.

ही घटना काल सायंकाळी 6 वाजण्याच्या सुमारास घडली. नीरज बुधनवर हा सहा वर्षांचा मुलगा रस्ता ओलांडत असताना त्याला कारची धडक बसली. त्याला उपचारासाठी गोमेकॉ रुग्णालयात दाखल करण्यात आले. मात्र रात्री उशिरा तिथे त्याचे निधन (Death) झाले. या घटनेमुळे परिसरात खळबळ उडाली आहे.

दरम्यान, आज काणकोणमध्ये (Canacona) बिबट्याच्या हल्ल्यात एकजण जखमी झाल्याने परिसरात घबराट पसरली आहे. पेडे-लोलये येथील दिलीप राम सतरकर याच्यावर बिबट्याने हल्ला केल्याने ते गंभीर जखमी झाले आहेत. भरवस्तीत बिबट्याच्या हल्ल्यामुळे नागरिक दहशतीत असल्याचं चित्र आहे.

पेडे-लोलये येथील दिलीप राम सतरकर(वय 45) यांच्यावर गुरुवारी 24 मार्च रोजी रात्री बिबट्याने (Leopard) हल्ला केला. घराजवळ फिरत असताना बिबट्याने केलेल्या हल्ल्यात ते जखमी झाले आहेत. त्याला उपचारासाठी काणकोण सामाजिक आरोग्य केंद्रात दाखल करण्यात आले आहे.