गोवा सरकारने येत्या 08 नोव्हेंबरला मेगा जॉब फेअर (Goa Mega Job Fair) आयोजित केले आहे. यामध्ये गोव्यातील तरूण-तरूणींना विविध क्षेत्रात कामाची संधी उपलब्ध होणार आहे. यासाठी राष्ट्रीय, आंतरराष्ट्रीय तीनशेहून अधिक कंपन्या सहभागी होणार आहेत. गोमंतकीय युवकांना रोजगार संधी उपलब्ध करून देण्यासाठी राज्य सरकारने हा अभिनव उपक्रम हाती घेतला आहे.

कामगार आणि रोजगार विभागामार्फत डॉ. श्यामाप्रसाद मुखर्जी मैदान, तालेगाव येथे हा जॉब फेअर मेळावा आयोजित करण्यात आला आहे. उमेदवारांना या जॉब फेअरमध्ये सहभागी होण्यासाठी नोंदणी बंधनकारक करण्यात आली आहे. नोकरी शोधत असलेल्या उमेदवारांसाठी हा उपक्रम महत्वाचा असून, अनेकांना त्यांचा फायदा होईल. या नोकरी मेळाव्याच्या माध्यमातून विविध क्षेत्रात इच्छुक उमेदवारांना संधी मिळेल. असे कामगार मंत्री बाबुश मोन्सेरात यांनी म्हटले आहे.

यावर्षी ऑगस्ट महिन्यात गोव्याचा बेरोजगारीचा दर 13.7 टक्के होता, त्याचवेळी देशाचा सरासरी दर 07 टक्के होता. पदवी घेणाऱ्या तसेच, पीजी करणाऱ्या विद्यार्थ्यांसाठी राज्यात दरवर्षी पुरेशा नोकरीच्या संधी निर्माण होत नाहीत. गोव्यात आयोजित भव्य नोकरी मेळावा अनेकांना नोकरीच्या संधी मिळवून देईल. नोकरी मेळाव्यासाठी आयटी, फार्मा, पर्यटन, हॉस्पिटॅलिटी, लॉजिस्टिक, ऑटोमोबाईल, आरोग्य, उत्पादन आणि विक्री क्षेत्रात नोकरीच्या संधी उपलब्ध होतील, असे मोन्सेरात यांनी म्हटले आहे.

अशी करा नोंदणी

नोकरी मेळाव्यात सामिल होण्यासाठी उमेदवारांना पूर्वनोंदणी करणे बंधनकारक आहे. यासाठी www.goajobfair.in या लिंकवर नोंदणी करता येईल. नोंदणीनंतर उमेदवारांनी एक क्युआर कोड मिळणार आहे, जो नोकरी मेळाव्याच्या ठिकाणी उमेदवारांना दाखवणे बंधनकारक आहे.