सासष्टी: राष्ट्रीय महामार्गाची (National Highway) कामे एरव्ही राष्ट्रीय महामार्ग प्राधिकरणामार्फत केली जातात. मात्र गोव्यात स्थानिक सार्वजनिक बांधकाम खात्यामार्फत (PWD) केले जात आहे ते केवळ कमिशन खाण्यासाठी चालले आहे, असा आरोप दक्षिण गोव्याचे खासदार फ्रान्सिस सार्दिन (Francisco Sardinha) यांनी केला.

पुढील सरकार आपलाच पक्ष घडवेल हे केवळ कॉंग्रेस (Congress) व भारतीय जनता पक्ष (BJP) हे दोनच पक्ष छातीठोकपणे सांगतात. बाकीचे पक्ष केवळ आपले अस्तित्व दाखविण्यासाठी निवडणूक लढवित आहेत. कॉंग्रेस पक्षाने गोव्याला पोर्तुगीज राजवटीतून मुक्त केले. गोव्याला घटक राज्याचा दर्जा दिला. ओपीनियन पोलद्वारे गोव्याचे अस्तित्व टिकविले. सध्या ज्या राष्ट्रीय महामार्गाची पायाभरणी होत आहे त्याची प्रक्रिया कॉंग्रेस राजवटीतच सुरू झाली होती, असेही सार्दिन यांनी सांगितले.

गोव्यात पुढील दीड ते दोन महिन्यांच्या आत विधानसभेच्या निवडणुका (Goa Assembly Elections 2022) होतील. तेव्हा जे लोकांची सेवा निष्ठेने व कर्तबगारीने करू शकतील, अशा उमेदवारांनाच निवडून द्या, असे आवाहनही सार्दिन यांनी केले.

कंत्राटी कामगारांना कायम करा..

कोविडच्या काळात स्वतःचा जीव धोक्यात घालून रुग्णांची सेवा केली त्यांना नोकरीसाठी प्राधान्य द्यावे. वीज खात्यात ८-१० वर्षांपासून कंत्राटी पद्धतीवर काम करतात त्यांना कायम करावे. वीज बीले जनतेला नियमितपणे देणे. पाणी बिलांमध्ये ज्या चुका झाल्या आहेत त्या तात्काळ सुधारून जनतेला सुधारीत बिले द्यावीत, अशा सूचना सार्दिन यांनी मुख्यमंत्री सावंत यांना व संबंधित मंत्र्यांना केल्या.