पणजी: मुख्यमंत्री डॉ. प्रमोद सावंत यांच्या हस्ते ११ व्या राष्ट्रीय हातमाग दिनानिमित्त पणजी येथे 'कुणबी: द प्राईड ऑफ गोवन टेक्स्टाईल' या हातमाग प्रदर्शनाचे उद्घाटन झाले. यावेळी विधानसभेचे अध्यक्ष रमेश तवडकर, आमदार कृष्णा साळकर यांच्यासह अन्य मान्यवर उपस्थित होते. गोव्याची समृद्ध वस्त्र परंपरा आणि वारसा जपण्याच्या उद्देशाने 'कुणबी: द प्राईड ऑफ गोवा टेक्सटाईल' या हातमाग प्रदर्शनाचे उद्घाटन करण्यात आले आहे.

यावेळी बोलताना मुख्यमंत्री डॉ. सावंत यांनी कुणबी साडीसह गोव्याच्या वस्त्रोद्योगातील कलाकारांचे कौतुक केले. ते म्हणाले की, "या प्रदर्शनातून आपल्या प्रतिभावान कलाकारांचे उत्कृष्ट काम समोर आले आहे. त्यांची निष्ठा आणि कौशल्य गोव्याच्या पारंपरिक वस्त्रांना एक वेगळी ओळख मिळवून देत आहे. यामुळे आपल्या समृद्ध वस्त्र परंपरेला नवसंजीवनी मिळाली आहे."

हे प्रदर्शन गोव्याच्या स्थानिक कला आणि कारागिरांना प्रोत्साहन देण्यासाठी एक महत्त्वाचे पाऊल मानले जात आहे. कुणबी साडी ही गोव्याच्या पारंपरिक वस्त्रांपैकी एक असून, या प्रदर्शनामुळे या कलेला राष्ट्रीय आणि आंतरराष्ट्रीय स्तरावर ओळख मिळण्यास मदत होणार आहे.

विधानसभेत 'कुणबी'चा समावेश

विधानसभा अधिवेशनाच्या कामकाजात कुणबी शाल पांगरून मंत्र्यांनी गोव्यातील या पारंपरिक वस्त्राचा बहुमान केला. मुख्यमंत्री सावंत यांच्यासह सभापती तवडकर आणि इतर आमदार देखील कुणबी शालीसह पाहायला मिळाले.

कुणबी वस्त्र म्हणजे काय?

कुणबी वस्त्र म्हणजे गोव्यातील कुणबी आदिवासी समुदायाशी संबंधित एक विशिष्ट प्रकारचे हातमाग वस्त्र. हे कापड त्याच्या लाल रंगाच्या चौकटी पॅटर्नसाठी ओळखले जाते. या साध्या पण मोहक डिझाइनमुळे त्याला एक वेगळी ओळख मिळाली आहे. कुणबी साडी, जी याच वस्त्रापासून बनवली जाते, ती पारंपरिकरित्या कुणबी महिला, विशेषतः भातशेतीच्या कामाशी संबंधित महिला परिधान करत असत.