सासष्टी: नाकेरी-बेतुल येथील नागरिकांनी शुक्रवारी (ता.४) जिल्हाधिकारी प्रशासन संकुलात मूक मोर्चा नेत तेथील दारूगोळा उत्पादन करणारी ह्युजेस प्रेसिजन मॅन्युफॅक्चरिंग प्रायव्हेड लिमिटेड कंपनीवर कडक कारवाई करण्याची मागणी केली.

काही दिवसांपूर्वी साठवून ठेवलेल्या दारूगोळ्यामुळे रात्रीच्या वेळी भयंकर मोठा स्फोट झाला होता व आग लागण्याची घटना घडली होती. सुदैवाने प्राणहानी झाली नाही. या घटनेनंतर तपासणीत तिथे आणखी १३ ते १४ टन दारूगोळा साठवून ठेवल्याचे स्पष्ट झाले होते.

या घटनेला वीस दिवस झाले तरी सरकारने ‘त्या’ कंपनीवर कुठलीही कारवाई केलेली नाही. स्थानिकांनी पोलिस व जिल्हा प्रशासनाला निवेदन सादर केले, तक्रार नोंदवली तरी अजून काहीच हालचाल न झाल्याने नागरिकांनी शुक्रवारी या मूक मोर्चाचे आयोजन केले होते.

यावेळी नागरिकांसमवेत स्थानिक आमदार एल्टन डिकॉस्ता उपस्थित होते. या मार्चात २५ ते ३० नागरिक होते. प्रथम हा मोर्चा जिल्हा प्रशासन संकुलाबाहेर अडविण्यात आला नंतर आमदारांच्या विनंतीवरून सर्वांना आत सोडण्यात आले.

तोपर्यंत कंपनीचा परवाना निलंबित

आमदार एल्टन डिकॉस्ता यांच्या नेतृत्वाखाली नागरिकांनी दक्षिण गोव्याच्या जिल्हाधिकारी एग्ना क्लेटस (आयएएस) यांची भेट घेतली. सध्या चौकशी व तपास सुरू आहे. ज्या दारूगोळ्याचा स्फोट झाला त्याचे अवशेष मुंबईत पाठवले असून त्यांच्याकडून अहवालाची अपेक्षा आहे. शिवाय चौकशी व तपास पूर्ण झाल्यावर अहवालावरून कारवाई केली जाईल. तोपर्यंत कंपनीचा परवाना निलंबित केला आहे, असे जिल्हाधिकाऱ्यांनी सांगितले.