Blast In Goa: नाकेरी परिसरात संचारबंदी कायम! स्फोटप्रकरणाचा अहवाल आल्यानंतरच पुढील निर्णय; जिल्हाधिकाऱ्यांची माहिती

मडगाव: नाकेरी-बेतूल येथील  दारूसाठा बंकरमधील स्फोटप्रकरणी दक्षिण गोव्याच्या जिल्हाधिकारी एग्ना क्लिटस म्हणाल्या, या संपूर्ण प्रकरणाचा तपास करण्यासाठी पेट्रोलियम ॲण्ड सेफ्टी ऑर्गनायझेशनने (पेसो) आपले मुंबई येथून पथक पाठविले आहे. या पथकाने केलेल्या तपासणीचा अहवालाची आम्ही वाट पाहात आहोत. तो आल्यावर पुढील निर्णय घेण्यात येईल.

मात्र, सुरक्षेचा उपाय म्हणून या परिसरात लागू केलेली संचारबंदी कायम ठेवण्यात आली आहे, असेही त्यांनी सांगितले.

गुरुवारी  रात्री  साडे दहाच्या सुमारास ही  दुर्घटना घडली होती. सुमारे साडेचौदा टन गनपावडर असलेल्‍या बंकरला आग लागल्‍याने मोठा स्‍फाेट झाला होता. या दुर्घटनेत बंकरची पूर्णत: नासधूस होऊन सहा कोटींची हानी झाली होती. तरी सुदैवाने प्राणहानी झाली नाही. 

या कंपनीचे मुख्‍य व्‍यवस्‍थापक अजय गोएंका यांनी हा दारूसाठा हाताळताना कंपनीकडून कुठल्‍याही प्रकारचा हलगर्जीपणा झालेला नाही. हे गोदाम सुरू करताना ‘पेसो’ने ज्‍या सूचना केल्‍या होत्‍या, त्‍यांचे तंतोतंत पालन केले आहे.