Mumbai Goa Highway: मुंबई-गोवा महामार्गाच्या दुरावस्थेविरुद्धच्या आंदोलनाला मनसे अध्यक्ष राज ठाकरे यांनी आज पनवेल येथे झालेल्या सभेत हिरवा झेंडा दाखवला. सर्वसामान्य लोकांना त्रास होईल असं नको पण आंदोलन असं करा कि सरकारला धडकी भरली पाहिजे.

पनवेलपासून सावंतवाडीपर्यंत मुंबई-गोवा महामार्गाचं काम वेळेत व्हावं ह्यासाठी पक्ष म्हणून ताकदीने रस्त्यावर उतरा. असे आवाहन राज ठाकरे यांनी महाराष्ट्र सैनिकांना केले.

राज ठाकरे यांच्या आंदोलनाला झेंडा दाखवल्यानंतर मनसैनिक आक्रमक झाले असून, मुंबई-गोवा महामार्गाचे काम केलेल्या कंपनीचे कार्यालय मनसेच्या कार्यकर्त्यांनी फोडलं आहे.

मनसेच्या मनसैनिकांनी माणगावमधील बांधकाम कंपनीचं कार्यालय फोडलं आहे. अशी माहिती समोर आलीय.

मुंबई गोवा महामार्गावर आत्तापर्यंत खर्च झालेला पैसा १५,६६६/- कोटी रुपये आहे. तरीही रस्ता झाला नाही. फक्त काहींच्या तुंबड्या भरल्या गेल्या. असा आरोप राज ठाकरेंनी या सभेतून केला.

मुंबई गोवा महामार्गावर आजपर्यंत २५०० लोकं मृत्युमुखी पडलेत. अनेकांना दुखणी लागली आहेत, गाड्यांचं नुकसान झालं आहे.

मी नितीनजींना विनंती केली होती की तुम्ही वैयक्तिक लक्ष घाला तर ते म्हणाले की अहो कॉन्ट्रॅक्टर पळून जातात. हे नेमकं मुंबई गोवा हायवेच्या बाबतीतच का घडलं? कोकणाचा विकास होऊ नये म्हणून कोणी प्रयत्न करतंय का? असा सवाल देखील राज ठाकरे यांनी सभेतून उपस्थित केला.

मुंबई-गोवा हायवेचं काम 2007 ला सुरु झालं, त्यानंतर इतकी सरकारं आली पण रस्त्याचं काम झालंच नाही आणि तरीही त्याच लोकांना निवडून कसं दिलं जातं? रस्ते खड्ड्यात गेले काय आणि आपण खड्ड्यात गेलो काय आपल्या मतदारांना काहीच वाटत नाही? अशा शब्दात राज ठाकरे यांनी टीका केली.