Nitin Gadkari on Mumbai Goa Highway: गोवा आणि कोकण भागासाठी मोठी खूशखबर आहे. मुंबई - गोवा राष्ट्रीय महामार्गाचे (एनएच-६६) बांधकाम यावर्षी डिसेंबरपर्यंत पूर्ण होईल आणि जानेवारी २०२४ मध्ये हा रस्ता वाहतुकीसाठी खुला होईल, अशी माहिती केंद्रीय रस्ते वाहतूक आणि महामार्ग मंत्री नितीन गडकरी यांनी गुरुवारी पत्रकार परिषदेत दिली.

यावेळी नितीन गडकरी म्हणाले की, आम्ही गोव्यात सुमारे १५ हजार कोटी रुपयांची रस्त्यांची कामे पूर्ण केली आहेत.

हल्लीच उद्‍घाटन झालेला नवीन झुवारी पूल हे त्याचे उदाहरण आहे. तसेच रस्ते वाहतूक आणि महामार्ग मंत्रालयाने गोव्यासाठी रिंग रोड प्रकल्पासाठी डीपीआर मंजूर केला आहे.

मुंबई-गोवा प्रवास साडेचार तासांत

गडकरी यांनी हवाई सर्वेक्षणाद्वारे मुंबई-गोवा महामार्गाची पाहणी केली. कोणत्याही परिस्थितीत या महामार्गाचे काम तातडीने पूर्ण केले जाणार आहे.

एकदा महामार्ग पूर्ण झाल्यानंतर मुंबई - गोवा हा प्रवास अवघ्या साडेचार तासांत करता येईल. या महामार्गासाठी १५५६६ कोटी रुपयांची तरतूद केली आहे, असेही नितीन गडकरी यावेळी म्हणाले.

आपले मंत्रालय वाहतुकीला अडथळा आणणारे टोल नाके न ठेवता महामार्गांवर उपग्रह आधारित भाडे संकलन सुरू करण्यासाठी प्रयत्नशील आहे. पर्यटन आणि दळणवळणाच्या उद्देशाने लांब समुद्रकिनारा लाभलेल्या कोकण प्रदेशासाठी सी प्लेन, हॉवरक्राफ्ट आणि वॉटर टॅक्सी सिस्टमच्या व्यवहार्यतेचा अभ्यास केला पाहिजे.

नितीन गडकरी, केंद्रीय मंत्री.