राज्यात नुकत्याच विधानसभा निवडणुका पार पडल्या आहेत. पुन्हा बहुताने भाजपने राज्यात सरकार स्थापन केले आहे. अशातच पुन्हा कॉंग्रेस राज्यात विरोधीपक्ष म्हणून सक्रिय होताना दिसत आहे. याच पार्श्वभूमीवर काणकोण ते मडगाव या राष्ट्रीय महामार्गाच्या (National Highway) दुर्दशेबाबत काँग्रेसने महामार्ग प्रशासनाला जाब विचारला आहे.

याआधी देखील कॉंग्रेसने (Congress) याठिकाणी पाठपुरावा केला होता. मात्र याकडे संबंधित विभागाने दुर्लक्ष केल्यामुळे सरचिटणीस जनार्दन भंडारी यांच्या नेतृत्वाखाली काणकोणातील (Canacona) नागरिकांनी अभियंत्यांच्या आल्तिनोतील कार्यालयात पाठ टेकवत अनोखे आंदोलन केल्याचे दिसत आहे.

दरम्यान, रस्त्याच्या कामाच्या पाठपुराव्याला अधिकारी ‘शून्य प्रतिसाद’ देत असल्याचे भंडारी यांनी सांगितले. आम्ही पीडब्ल्यूडीच्या सर्व संबंधित अधिकाऱ्यांना भेटलो. मात्र ते रस्ता पूर्ण करण्याबाबत कोणताही प्रतिसाद देत नाहीत. तसेच नव्याने बांधलेल्या मनोहर पर्रीकर बायपाससह NH 66 वरील सर्व प्रलंबित रस्त्यांची कामे सुरू करण्याची मागणी जनार्दन भंडारी यांनी केली. अधिकारी कंत्राटदारांकडून लाच घेतात आणि त्यामुळे ते कामाकडे दुर्लक्ष करून त्यांना हवे तसे वागतात असा आरोप देखील यावेळी त्यांनी केला. तसेच संबंधित अधिकाऱ्यांना ब्लॅक लिस्टमध्ये टाकण्याची मागणी देखील यावेळी जनार्दन भंडारी यांनी केली.

दरम्यान, टोनीनगर-सावर्डे येथील स्थानिकांनी आज पाण्याची वाढीव बिले आल्याने बाणसाय येथील सार्वजनिक बांधकाम खात्याच्या कार्यालयावर मोर्चा नेला. भरमसाठ बिले आल्याने गोंधळ उडाला असून नाराजी व्यक्त करण्यात येत आहे. तीन महिन्यांची वाढीव बिले एकत्रित आल्याने ती कशी भरावी, असा संतप्त सवाल स्थानिक उपस्थित करू लागले आहेत.

यासंदर्भात 25 रोजी पाणी खात्याच्या कार्यालयात लेखी तक्रार दाखल करून त्यावर तोडगा काढावा, असे म्हटले होते. मात्र संबंधित खात्याकडून कोणताच प्रतिसाद नसल्याने अखेर आज मोर्चा आणावा लागला, असे सर्वेश सावंत यांनी सांगितले.