वास्को: मुरगाव हार्बर कोस्टल पोलीस स्थानकातील पोलीस उपनिरीक्षक गणेश परब (वय 59) याच्याविरोधात एका 35 वर्षीय महिलेने विनयभंगाची तक्रार केली आहे. याप्रकरणात मुरगाव पोलिसांनी गुन्हा नोंद केला आहे. विनयभंगाचा गुन्हा नोंद झालेला संशयित आरोपी परब हा उपनिरीक्षक म्हणून कार्यरत आहे.

(Mormugao psi ganesh parab Case filed against for molestation )

मुरगाव पोलिसांनी दिलेल्या माहितीनूसार, शनिवारी (दि. 1) उशिरा रात्री पीडित महिलेने विनयभंग झाल्याची तक्रार नोंदवली. सविस्तर वृत्त असे की, हार्बर कोस्टल पोलीस स्थानकावर उपनिरीक्षक म्हणून कार्यरत गणेश परब शुक्रवारी (दि. 30) दुपारी मित्राला भेटण्यासाठी गेला. तेथे त्याने मित्राबरोबर मद्यपान केल्याचा संशय पोलिसांना आहे. त्यानंतर परब याने बोगदा स्मशानभूमीजवळील परिसरात जेथे पीडित महिला राहते, त्या खोलीत घुसून विनयभंग केला, अशी तक्रार पीडितेने नोंदवली आहे.

परब याला सेवेतून निवृत्त होण्यास फक्त तीन महिने राहिले

या प्रकरणी मुरगाव पोलिसांनी परब विरोधात भादंस 354, 448 या कलमाखाली गुन्हा नोंद केला आहे. विनयभंग प्रकारणात गुन्हा नोंद झालेला गणेश परब बोगदा येथील पोलीस क्वॉर्टरमध्ये राहतात, अशी माहिती मुरगाव पोलिसांनी दिली. विनयभंगाचा गुन्हा नोंद झालेल्या संशयित गणेश परब याला पोलीस सेवेतून निवृत्त होण्यास फक्त तीन महिने राहिले आहेत, अशी माहिती पोलीस सूत्रांनी दिली. मुरगावचे निरीक्षक राघोबा कामत यांच्या मार्गदर्शनाखाली या प्रकरणाचा तपास चालू आहे.