मोरजी: मोपा लिंक रोडसाठी सरकारकडून कंत्राटदाराला रान मोकळे झाले आहे. तो खोदकाम तसेच झाडांची कत्तल करत सुटला आहे. दुसरीकडे शेतकरी आम्हाला कोणी न्याय देतो का न्याय, या आशेने वेगवेगळ्या विविध माध्यमांतून जनजागृती चळवळ, आंदोलने तसेच न्यायालयाचे दरवाजे ठोठावत आहेत. परंतु तेथेही ‘तारीख पे तारीख’ दिली जात आहे. आता आज शुक्रवार दि. 25 मार्चला होणाऱ्या सुनावणीकडे सर्वांचे लक्ष लागून राहिले आहे.

मोपा लिंक रोड कामाबाबत एका बाजूने न्यायालयात सुनावणी सुरू आहे तर दुसऱ्या बाजूने काम खुलेआम सुरू आहे. राष्‍ट्रीय महामार्ग ते मोपा विमानतळ या साडेसहा किलोमीटर लांबीच्या रस्त्यासाठी सरकारने गतसाली जमीन संपादनाची प्रक्रिया सुरू केली होती. ही प्रक्रिया पूर्णपणे बेकायदा असल्याचा दावा करत काही पीडित शेतकऱ्यांनी न्यायालयात याचिका दाखल केली आहे. त्या याचिकेवर उद्या सुनावणी होणार आहे. तर, दुसऱ्या बाजूने वारखंडचे सरपंच संजय तुळसकर यांच्या नेतृत्वाखालील पंचायत मंडळाने मोपा लिंक रोड करणाऱ्या कंत्राटदाराला लेखी नोटीस पाठवून काम बंद करण्याचा आदेश दिला होता. परंतु कंत्राटदाराने पंचायतीच्या आदेशाला पंचायत संचालनालयाकडे आव्हान देत स्थगिती मिळवली. या प्रकरणी 15 मार्च रोजी सुनावणी झाली होती.