पेडणे: मोपा विमानतळावर वाढविलेले पार्किंग शुल्क त्वरित कमी करावे अन्‍यथा तीव्र आंदोलन छेडण्यात येईल, असा इशारा शिव वॉरियर्स टॅक्सी संघटनेने दिला आहे.

नागझर येथे घेतलेल्या पत्रकार परिषदेत शिव वॉरियसचे अध्यक्ष रामा वारंग, सचिव निखिल महाले, आनंद गावस, प्रदीप पटेकर व टॅक्सी व्यावसायिक उपस्थित होते. ‘जीएमआर’ कंपनी टॅक्सी व्यावसायिकांवर अन्याय करीत असून ही कंपनी सरकारलाही घाबरत नाही.

या कंपनीने कुणालाच विश्वासात न घेता विमानतळावर पार्किंग शुल्कात मोठी वाढ करण्याचा निर्णय घेतला आहे. याचा आम्ही तीव्र निषेध करतो, असे यावेळी सांगण्यात आले.

आनंद गावस यांनी सांगितले, मुख्यमंत्री डॉ. प्रमोद सावंत यांनी कंपनीचे अधिकारी व टॅक्सी व्यावसायिक संघटनेसमवेत घेतलेल्या बैठकीत विमानतळावर पार्किंग शुल्क, भाडेदर वाढवताना सर्वांना विश्वासात घेतले जाईल, असे नमूद केले होते.

रु. ८० वरून थेट २०० वर शुल्क

संघटनेचे सचिव निखिल महाले यांनी सांगितले, जीएमआर कंपनीने ८० रुपये असलेली पार्किंग फी थेट दोनशे रुपयांवर नेली आहे. हा दर जर नियंत्रणात आला नाही तर रस्त्यावर उतरण्यावाचून पर्याय राहणार नाही.

दामू नाईक, तानावडेंची घेतली भेट

दरम्यान मोपा विमानतळ टॅक्सी धारकांनी गुरुवारी संध्याकाळी गोवा प्रदेश भाजप प्रदेशाध्यक्ष दामू नाईक व खासदार सदानंद तानावडे यांची भेट घेउन पे पार्किंग दरा संबंधी चर्चा केली.त्यांनी या प्रकरणी लक्ष घालण्याचे आश्वासन दिले.