पणजी: यंदा ४ जून रोजी दाखल झालेल्या नैऋत्य मोसमी पावसाने गोव्यासह संपूर्ण देशभरातून आज (१५ ऑक्टोबर) माघार घेतली. राज्यात यंदा मॉन्सून कालावधीत मोठ्या प्रमाणात पाऊस पडल्याने नवा विक्रम प्रस्थापित केला.

गोवा वेधशाळेच्या उपलब्ध आकडेवारीनुसार, १२४ वर्षांतील सर्वाधिक पावसाची नोंद यंदा करण्यात आली. जुलै महिन्यात तब्बल ७९.२५ इंच पावसाची नोंद केली, जी आतापर्यंतच्या जुलैमधील सर्वाधिक पावसाची नोंद आहे.

राज्यात ४ जून ते ३० सप्टेंबरपर्यंत एकूण ४,४००.७ मिमी म्हणजेच १७३.२५ इंच पावसाची नोंद केली होती. तर मॉन्सूनोत्तर कालावधीला सुरवात झाल्यापासून १ ऑक्टोबरपासून १५ ऑक्टोबरपर्यंत पावसाने माघार घेईपर्यंत एकूण १५१.१ मिमी म्हणजेच ५.९४ इंच पावसाची नोंद झाली.

नहुष कुलकर्णी, संचालक, गोवा वेधशाळा.

नैऋत्य मोसमी वाऱ्याने देशभरातून माघार घेतली असली, तरी उत्तर-पूर्व मॉन्सूनचे अप्रत्यक्ष परिणाम गोव्यातील वातावरणावर दिसून येतील. त्यामुळे पुढील काही दिवस राज्यात तुरळक ते मध्यम स्वरूपाचा पाऊस असेल.

वाळपईत सर्वाधिक पाऊस!

राज्यात गेल्या २४ तासांत वाळपईत सर्वाधिक ६१.२ मि.मी. पावसाची नोंद. तर म्हापसा १४.२ मि.मी., पेडणे ८.५ मि.मी., फोंडा २४.० मि.मी., पणजी ६.० मि.मी., जुने गोवा ७.० मि.मी., साखळी १५.४ मि.मी., काणकोण २५.४ मि.मी., दाबोळी ४२.४ मि.मी., मडगाव १७.४ मि.मी., मुरगाव २९.८ मि.मी., केपे ३८.३ मि.मी., व सांगेत ३२.० मि.मी., पाऊस.