IMD monsoon update: अखेर, शेतकऱ्यांसाठी आणि उष्णतेने हैराण झालेल्या नागरिकांसाठी एक मोठी आनंदाची बातमी समोर आली आहे. नैऋत्य मान्सूनने रविवार (२५ मे ) रोजी वेगाने आगेकूच केली आहे. भारतीय हवामान विभागाच्या माहितीनुसार, मन्सूनने पश्चिम-मध्य आणि पूर्व-मध्य अरबी समुद्राच्या काही भागांत, कर्नाटकातील अधिक भागांत आणि संपूर्ण गोवा व्यापला आहे. याशिवाय, महाराष्ट्राच्या काही भागांत, पश्चिम-मध्य आणि उत्तर बंगालच्या उपसागरात, तसेच मिझोराम, मणिपूर आणि नागालँडच्या काही भागांतही मान्सूनने धडक दिली आहे.

पुढील ३ दिवसांत मान्सूनची दमदार वाटचाल

पुढील तीन दिवसांत नैऋत्य मान्सून मध्य अरबी समुद्राच्या काही आणखी भागांमध्ये, मुंबईसह महाराष्ट्राच्या उर्वरित भागांमध्ये, बंगळूरूसह कर्नाटकात, आंध्र प्रदेशच्या काही भागांमध्ये, तामिळनाडूच्या उर्वरित भागांमध्ये

पश्चिम-मध्य आणि उत्तर बंगालच्या उपसागराच्या काही अधिक भागांमध्ये आणि ईशान्येकडील राज्यांच्या आणखी काही भागांमध्ये प्रगती करण्यासाठी अनुकूल परिस्थिती निर्माण झाली आहे.

याचा अर्थ असा की, पुढील काही दिवसांत महाराष्ट्रासह अनेक राज्यांमध्ये मान्सूनचे जोरदार आगमन होण्याची अपेक्षा आहे. शेतकऱ्यांसाठी ही अत्यंत महत्त्वाची बातमी असून, यामुळे पेरणीच्या कामांना वेग येणार आहे. तसेच, वाढत्या उकाड्यापासून नागरिकांना दिलासा मिळणार आहे. हवामान विभागाच्या या अंदाजानुसार, आता पावसाळ्याची खऱ्या अर्थाने सुरुवात होणार आहे.